1 Tamin’ ny taona nahafatesan’ i Ozia mpanjaka no nahitako ny Tompo nipetraka teo ambonin’ ny seza fiandrianana avo sady manerinerina, ary ny ebaneban’ akanjony nahafeno ny tempoly.2 Nisy serafima nitsangana teo amboniny, samy nanana elatra enina avy; ny roa nanaronany ny tavany, ny roa nanaronany ny tongony, ary ny roa nanidinany.3 Ary nanandratra ny feony izy ka nifamaly hoe: Masina, masina, masina Jehovah, Tompon’ ny maro; Henika ny voninahiny ny tany rehetra.4 Dia nihorohoro ny fanambanin’ ny tokonana noho ny feon’ ireo nanandratra ny feony; ary feno setroka ny trano.5 Dia hoy izaho: Lozako! maty aho! fa lehilahy maloto molotra, sady ato amin’ ny firenena maloto molotra no itoerako, fa ny mpanjaka, dia Jehovah, Tompon’ ny maro, no efa hitan’ ny masoko.6 Dia nanidina nanatona ahy ny serafima anankiray nitondra vainafo teny an-tànany, izay nalainy tamin’ ny tandra avy teo amin’ ny alitara.7 Ary natehiny ny vavako izany, ka hoy izy: Indro, efa nitehika tamin’ ny molotrao io; ka dia afaka ny helokao, ary voavela ny fahotanao.8 Ary nandre ny feon’ ny Tompo aho nanao hoe: Iza no hirahiko, ary iza no handeha ho irakay? Dia hoy izaho: Inty aho, iraho aho.
ISAIA 6 :1-8Hoy Izy : « indro efa nitehika tamin’ny molotrao io, ka dia afaka ny helokao, ary voavela ny fahotanao » and 7
1-Andriamanitra feno fahamasinana (and 1-4)
Niseho tamin’ny fiantsoana an’i Isaia mpaminany Andriamanitra masina. Fahitana feno fiandrianan’ny fahamasinan’ Andriamanitra no hitany . Ny seza fiandrianana sy ny ebaneban’ akanjo dia maneho ny maha-Mapnjaka Azy ary ny setroka nameno ny Tempoly maneho ny maha- Andriamanitra manatrika ny vahoakany Azy. Miharihary eo amin’io fahamasinan’ Andriamantra io ny elanelana misy eo amin’ny fahalehibiazany sy ny fahalemen’olombelona mpanota .Maneho izany fa avy amin’ Andriamanitra tanteraka ny fiantsoana ny mpanompony .Mampieritreritra ny mahita ireo mpanompo samihafa manira-tena sy manamasi-tena samirery.
2-Andriamanitra mamela heloka (and 5-8)
Fiaraha- monina simban’ny fahalovana sy nanjakan’ny faharatsiana no nanirahana an’i Isaia . Vaky vava izy raha niteny fa « ato amin’ny firenena maloto molotra no itoerako » (and5), saingy matoa Andriamanitra manaiky hifanena mivantana ho hitany maso dia Andriamanitra akaiky ny vahoakany Izy , ary vonona hamela izay rehetra mety ho fahadisoany . Ny fiaikena fa diso anefa no fanalahidy lehibe handraisana ny famelankeloka atolotr’ Andriamanitra (and 5,7). Ny olona voavela heloka dia sahy mandeha amin’ny fahatokiana hanao ny asan’ Ilay niantso azy .
Fanontaniana :
Azona Ifampizarana amin’ny hafa ve ny fomba nentin’ Andriamanitra niantsoana anao ?
Ho an’Andriamanitra irery ihany ny voninahitra. Amen !