4 Ry mpisintaka mijangajanga, tsy fantatrareo va fa fandrafiana an’ Andriamanitra ny fisakaizana amin’ izao tontolo izao? Koa na iza na iza te-ho sakaizan’ izao tontolo izao, dia fahavalon’ Andriamanitra izy.5 Ary ataonareo va fa miteny foana ny Soratra Masina? Ny fanahy, izay nampitoeriny ato anatintsika dia iriny amin’ ny fahasaro-piaro..6 Nefa manome fahasoavana bebe kokoa Izy. Koa hoy izy: « Andriamanitra manohitra ny mpiavonavona, fa manome fahasoavana ho an’ ny manetry tena ».7 Ka dia maneke an’ Andriamanitra ianareo; ary manohera ny devoly, dia handositra anareo izy.8 Manatòna an’ Andriamanitra, dia hanatona anareo Izy. Diovy ny tànanareo, ry mpanota; ary ataovy madio ny fonareo, ry mpiroa saina.9 Oria, sy mitomania, ary midradradradrà; aoka hody fitomaniana ny fihomehezanareo, ary hody fanjoretana ny fifalianareo.10 Manetre tena eo anatrehan’ ny Tompo, dia hanandratra anareo Izy.
JAKOBA 4 :4-10
SAFIDIO NY LALAN’NY FANOMPOANA NY FIAINANA
1-Mizotra mankaiza ny lalanao
Mahakasika ny fifanajan’ny mpivady no entin’i Jakoba mitondra vaha-olana ho an’ny fiainan’ny mpino. Ny tsy fankatoavana ny Tenin ‘ Andriamanitra ka mahatonga ny olona handeha amin’ny filàna misy eto amin’izao tontolo izao, ny fanompoana zavatra hafa dia endriky ny fijangajangana ara-panahy mila ialana. Ny olona te-hanompo an’ Andriamanitra kanefa miray tsikombakomba, mifandray amin’ny tontolo manohitra ny finoana Azy dia tsy ankasitrahany. Tarihiny ianao ankehitriny: iza no tena tompointsika? Sao mbola mampifangaro ny fanompoana an’ Andriamanitra amin’ny zavatra hafa. Diniho ny làlanao, mangataha ny Fanahy Masina hitari-dàlana anao.
2-Havaozy ny fanolorantenanao
Mamatotra ny olona ny tontolon’ny fahotana . Afaka hiala sy handresy ilay ratsy anefa ny olona raha manaiky hibebaka ka hanolotra marina ny fiainany ho an’ Andriamanitra, hanaiky hotapahin’ Andriamanitra ny fiainany sy ny ho aviny. Manao antso avo noho izany i Jakoba (and 7-10). Fibebahana no làlana tokana afaka manitsy ny toe-panahy sy ny fitondrantenan’ny olona. Ny olona mametraka ny fiainany, manaiky hotarihan’ Andriamanitra irery ihany no mandresy ny devoly. Aza misalasala ary havaozy ny fanolorantenanao. Ekeo hiasa hanavao anao ny Fanahy Masina omen’ny Tompo anao.
Fanontaniana:
Nahoana no tsy ankasitrahan’ Andriamanitra ny fivavahana miaro faharatsiana ?
Ho an’Andriamanitra irery ihany ny voninahitra. Amen !