13 Fa tsy tianay tsy ho fantatrareo, ry rahalahy, ny amin’ izay modimandry, mba tsy hahalahelovanareo tahaka ny sasany izay tsy manana fanantenana.14 Fa raha inoantsika fa efa maty Jesoa sady efa nitsangana indray, dia toy izany koa no hitondran’ Andriamanitra izay efa nodimandry tao amin’ i Jesoa hiaraka aminy.15 Fa izao no lazainay aminareo amin’ ny tenin’ ny Tompo: isika, izay velona ka mbola mitoetra mandra-pihavin’ ny Tompo, dia tsy mba hialoha izay efa nodi-mandry tsy akory.16 Fa ny tenan’ ny Tompo no hidina avy any an-danitra amin’ ny fiantsoana sy ny feon’ ny arikanjely ary ny trompetran’ Andriamanitra, ka izay maty ao amin’ i Kristy no hitsangana aloha;17 ary rehefa afaka izany, dia isika izay velona ka mbola mitoetra no hakarina hiaraka Aminy ho eny amin’ ny rahona hitsena ny Tompo any amin’ ny habakabaka; dia ho any amin’ ny Tompo mandrakariva isika.18 Koa dia mifampionòna ianareo amin’ izany teny izany.
1 TESALONIANA 4 :13-18Valiteny nasetrin’i Paoly ho an’ireo miroa saina momba ny andro farany sy ny amin’ireo mpino efa nodimandry ity. Nambarany fa tsy tokony halahelo sy hifampionona ny mpino satria :
1-Manahaka an’i Jesoa Kristy
I Jesoa Kristy no efa maty sy nitsangana tamin’ny maty ary nasandratr’ Andriamanitra . Hanahaka Azy toy izany koa ny mino. I Jesoa mivantana rahateo koa no efa nilaza fa izay mino Azy dia tsy ho faty mandrakizay . Fototry ny finoana kristiana mihitsy ny fahafatesan’ny Tompo hamonjy ny olona sy ny fitsanganany tamin’ny maty . Fa « raha tsy misy fitsanganana amin’ny maty na dia Kristy aza dia tsy natsangana , ary raha tsy natsangana Kristy dia foana ny toriteninay ary foana ny finoanareo » 1 Kor 15.13-14 .
2-Ho any amin’ny Tompo mandrakariva
Tsy fanolorana tetiandrom-paminaniana momba ny andro farany no nataon’i Paoly fa fampaherezana ny mpino. Aseho amin’ny antsipirihany kokoa eto ny momba ny dia nalehan’i Jesoa araka ny Jaona 14 :1-3 , fa handeha hamboatra fitoerana ho an’ny mino . Ho tanteraka ny fifalian’ny mino satria tsy mana-pahataperana intsony ny fiarahana amin’ny Tompo. Tsy hisy intsony fisedrana sy fizahan-toetra samihafa. Ambaran’i Paoly any amin’ny Fil 1 :23 , fa « miandry hiala ka ho any amin’i Kristy , satria tsara lavitra izany » .
Fanontaniana:
Ahoana no fampaherezana tokony hataon’ny kristiana rehefa hamangy fahoriana ?
Ho an’Andriamanitra irery ihany ny voninahitra. Amen !