1 Na dia miteny amin’ ny fitenin’ ny olona sy ny anjely aza aho, kanefa tsy manana fitiavana, dia tonga varahina maneno sy kipantsona mikarantsana aho.2 Ary na dia manana faminaniana aza aho ka mahalala ny zava-miafina rehetra sady manana ny fahalalana rehetra, ary na dia manana ny finoana rehetra aza aho ka mahafindra tendrombohitra, kanefa tsy manana fitiavana, dia tsinontsinona aho.3 Ary na dia omeko hohanin’ ny malahelo aza ny fananako rehetra, ary na dia atolotro hodorana aza ny tenako, kanefa tsy manana fitiavana aho, dia tsy mahasoa ahy akory izany.4 Ny fitiavana mahari-po sady mora fanahy; ny fitiavana tsy mialona, tsy mirehareha, tsy mieboebo,5 tsy manao izay tsy mahamendrika, tsy mitady ny azy, tsy mora sosotra, tsy manao otri-po,6 tsy mifaly amin’ ny tsi-fahamarinana, fa miara-mifaly amin’ ny fahamarinana kosa,7 mandefitra ny zavatra rehetra, mino ny zavatra rehetra, manantena ny zavatra rehetra, maharitra ny zavatra rehetra.8 Ny fitiavana tsy ho levona mandrakizay; fa raha ny faminaniana, dia ho levona; na ny fiteny tsy fantatra, dia hitsahatra; na ny fahalalana, dia ho foana.9 Fa sombintsombiny ny fahalalantsika, ary sombintsombiny ny faminaniantsika;10 fa rehefa tonga ny tanteraka, dia tsy hisy sombintsombiny intsony.11 Fony mbola zaza aho, dia niteny toy ny zaza, nihevitra toy ny zaza, nisaina toy ny zaza; fa nony efa lehibe aho, dia nariako ny fahazazana.12 Fa ankehitriny isika mizaha ao amin’ ny fitaratra ka tsy mahita marina; fa rahatrizay dia mifanatrika; ankehitriny sombintsombiny no fantatro; fa rahatrizay dia ho fantatro tsara toy izay nahafantarana ahy.13 Ary ankehitriny dia ireto telo ireto no mitoetra: ny finoana, ny fanantenana, ny fitiavana: fa ny fitiavana no lehibe amin’ ireo.
I KORINTIANA 13 :1-13
NY TENA FITIAVANA DIA FAHENDRENA
Miseho amin’ny fananana fitiavana ny fahendrena eto ka ny fijerena ny olona manodidina ny tena fa tsy fitiavan-tena velively akory no entin’ny Soratra Masina manambara izany .
1-Manome lanja ny fisian’ilay manam-pitiavana
Izay atao tsy amin’ny fitiavana dia tsinotsinona avokoa ary latsa-danja manoloana ny fivavahan’ny Jentilisa , izay nampiasa ny varahina maneno sy ny kipantsona mikarantsana raha mivavaka izy . Ny asa atao am-pitiavana no hahazoantsika sitraka satria miharihary ny hatsarampon’ilay miasa noho ny fitiavana nanaovana izany . Tsarovy Jesoa Kristy nanolotra ny ainy ho antsika. Vitany indray mandeha monja teo amin’ny hazo fijaliana ny famonjena antsika. Tsy misy manana fitiavana lehibe noho izao dia ny manolotra ny ainy hamonjy ny sakaizany (Jao 15 :13). Aoka hiasa amin’ny fitiavana toy izany isika.
2-Mitoetra mampiray amin’ny fahamarinana
Ireo toetran’ny tena fitiavana hita eto amin’ny and 4-7 dia mampianatra ny kristiana handini-tena manolona ny olona iarahany sy ny olona manodidina azy. Mitarika antsika mihitsy hanahaka an’i Jesoa Kristy izany. Izy no hery sy fahendren’ Andriamanitra. Koa anjarantsika ny manolokolo ny fitiavany antsika amin’ny alalan’ny finoana Azy .Manamafy izany fa tsara ny fanantenana sy ny finoana fa sty feno ireo raha tsy efa ao ny fItiavana ambony indrindra .
Ho an’Andriamanitra irery ihany ny voninahitra. Amen !