12 Fa isika tsy nandray ny fanahin’ izao tontolo izao, fa ny Fanahy Izay avy amin’ Andriamanitra, mba ho fantatsika izay zavatra nomen’ Andriamanitra antsika.13 Izany koa no lazainay, tsy amin’ ny teny ampianarin’ ny fahendren’ olona fa amin’ ny teny ampianarin’ ny Fanahy, raha milaza zava-panahy amin’ izay olona araka ny Fanahy izahay.14 Fa ny olona izay araka ny nofo ihany dia tsy mba mandray izay an’ ny Fanahin’ Andriamanitra; fa fahadalana aminy izany sady tsy azony, satria araka ny Fanahy no amantarana izany.15 Fa ny olona araka ny Fanahy kosa dia mahafantatra ny zavatra rehetra, kanefa izy tsy fantarin’ olona.16 Fa iza no nahafantatra ny sain’ ny Tompo mba hampianatra Azy ?. Fa izahay manana ny sain’ i Kristy.
1 KORINTIANA 2 :12-16
NY ASAN’NY FANAHY MASINA AO AMIN’NY MINO
1- Ny olona araka ny Fanahy
Mandray ny Fanahy izay avy amin’ Andriamanitra ny mino (and 12). Mampianatra ny mpino sy ny Fiangonana ny Fanahy Masina hino sy hahalala an’i Jesoa Kristy Tompo sy ny sitrapon’ Andriamanitra . Mandray ny fanomezan’ Andriamanitra avy amin’ny Fanahy Masina ny mino (and 14) izay antsoina hoe: « fanomezam-panahy na fanomezam-pahasoavana »(1 Kor 12 :4-11. Mahafantatra ny zavatra rehetra ny olona araka ny Fanahy (and 15). Fantany tsara ny tokony hatao sy ny tsy tokony hatao. Mizotra amin’ny fanazavan’ny Fanahy Masina ny mino an’i Jesoa Kristy amin’ny fampianarany na ny toriteniny sy ny fiainany (and 12) .
2-Ny olona araka ny nofo
Ilazana ny olona tsy nandray ny Fanahy Masina. Eo amin’ny Fiangonana ihany koa dia misy ny olona araka ny nofo (and 14). Tsy manaiky ho baikon’ny Fanahy Masina izy ireny. Ny fahalalana sy ny fahaizana ary ny filàna ao aminy no manapaka ny fiainany manokana eo amin’ny asa sy ny fanompoana ny Tompo. Miorina amin’ny fahendrena araka an’izao tontolo izao fa tsy araka an’i Kristy, ilay fahendren’ Andriamanitra ny olona araka ny nofo. Mitoetra amin’ny fahotana mandrakariva ny olona araka ny nofo. Isaorana ny Tompo fa ny fikasany dia ny handraisan’ny olona rehetra ny Fanahy Masina (Joela 3 :1). Ambarao amin’ny olona rehetra izany avaovao izany.
Fanontaniana:
Diniho : olona araka ny Fanhy MASINA
Ho an’Andriamanitra irery ihany ny voninahitra. Amen !