28 Ary mianara ny fanoharana ny amin’ ny aviavy: Raha vao manaroka ny rantsany ka mandravina, dia fantatrareo fa efa akaiky ny lohataona.29 Dia tahaka izany koa hianareo, raha vao hitanareo fa tonga izany zavatra izany, dia aoka ho fantatrareo fa efa akaiky eo am-baravarana Izy.30 Lazaiko aminareo marina tokoa fa tsy mba ho lany ity taranaka ity mandra-pahatongan’ izany rehetra izany.31 Ny lanitra sy ny tany ho levona, fa ny teniko tsy mba ho levona.32 Fa ny amin’ izany andro na ora izany dia tsy misy mahalala, na dia ny anjely any an-danitra, ary na dia ny Zanaka aza, afa-tsy ny Ray ihany.33 Mitandrema, miambena, ka mivavaha; fa tsy fantatrareo izay hihavian’ ny fotoana.34 Izany dia tahaka ny olona nandeha hivahiny, izay nandao ny tranony ka nanome fahefana ny mpanompony, ka samy notolorany ny raharahany avy, ary ny mpiandry varavarana dia nasainy niambina tsara;35 Koa miambena hianareo, fa tsy fantatrareo izay andro hihavian’ ny tompon-trano, na ho hariva, na ho mamatonalina, na ho maneno akoho, na ho maraina,36 fandrao avy tampoka izy ka mahita anareo matory.37 Ary izay lazaiko aminareo dia lazaiko amin’ ny olona rehetra koa: Miambena
MARKA 13 :28-37
ANTSO HO AMIN’NY FIBEBAHANA
1-Mbola hiverina ny Tompo
Ampiasain’i Jesoa Kristy indray eto ny fanoharana ny amin’ny aviavy mba hahafahan’ny mpianatra mandray fampianarana, fananarana hiatrehana ny ho avy. Ahafahan’ny olona mamantatra ny fizaran-taona sy ny fiovana ny aviavy rehefa mamontsika. Araka izany, dia hampahafantatra ny olona i Jesoa Kristy fa hisy tokoa ny zavatra hitranga amin’ny fotoana hiverenany indray. Hiova ny toe-javatra misy iainan’ny olona eto amin’ity izao tontolo izao ity. Noho izany, tsy tokony ho variana fa hiomana mandrakariva hiandry ny fiverenany .
2-Mila miomana mandrakariva isika
Hiverina ny Tompo. Raha fantatra ny fotoana hiverenany dia afaka mandamina ny fotoana ho fiomanana ny mpannara-dia Azy. Ambarany mazava tsara anefa fa tsy misy mahalala io fotoana hiverenany io. Andriamanitra irery ihany, Ilay naniraka Azy. Araka izany, ny fiomnana tsara indrindra ho an’ny mpino dia ny fiambenana. Fampiorenana ny finoana hahafahana mitoetra ho mahatoky ao amin’ Andriamanitra amin’ny fankatoavana ny sitrapony, fanafoanana ny sitrapon’ny tena. Miambina amin’ny alalan’ny vavaka sy ny fandinihana ny fiainana ny Tenin’ Andriamanitra. Fiainana amin’ny fahamasinana araka an’ Andriamanitra. Mahaiza àry miomana fa tsy ho fantatrao ny fotoana hiavian’ny Tompo indray.
Fanontaniana:
Raha ho avy ny Tompo, vonona ve ianao ?
Ho an’Andriamanitra irery ihany ny voninahitra. Amen !