13 Ary hoy Jehovah tamin’ i Mosesy: Mifohaza maraina koa hianao dia mitsangana eo anatrehan’ i Farao, ka lazao aminy hoe: Izao no lazain’ i Jehovah, Andriamanitry ny Hebreo: Alefaso ny oloko hanompo Ahy14 Fa ankehitriny izao dia halefako ny areti-mandringana rehetra avy atỳ Amiko hamely ny fonao sy ny mpanomponao ary ny vahoakanao, mba hahafantaranao fa tsy misy tahaka Ahy amin’ ny tany rehetra.15 Fa ankehitriny, raha izay Aho no naninjitra ny tanako hamely anao sy ny vahoakanao amin’ ny areti-mandringana, dia efa fongotra tamin’ ny tany ianao.16 Kanefa izao indrindra no nampaharetako anao, dia ny hampahita anao ny heriko mba hambara any amin’ ny tany rehetra ny anarako.17 Mbola mirehareha amin’ ny oloko ihany va ianao ka tsy handefa azy?18 Indro, rahampitso toy izao dia hampilatsaka havandra be dia be Aho, izay tsy mbola nisy toy izany teto Egypta hatramin’ ny andro nisiany mponina ka mandraka ankehitriny.19 Koa ankehitriny, maniraha mba hanangona faingana ny bibinao sy izay rehetra anananao any an-tsaha; fa ny olona rehetra sy ny biby fiompy izay ho hita any an-tsaha ka tsy ho enti-mody dia hilatsahan’ ny havandra ka ho faty avokoa.
EKSODOSY 9 :13-19
MAMONJY NY OLONY ANDRIAMANITRA
1-Mahery amin’ny teniny Andriamanitra
Alefaso ny oloko handeha, hoy ny Tompo. Ampitain’i Mosesy amin’i Farao izany. Andriamanitra rehefa miteny dia misy asa tanterahany. Teny manafaka ny teniny, ka avantana amin’ny mpampahory sy ny mpanandevo ny vahoakan’ Andriamanitra. Mahery amin’ny famindrampo ny Tompo , tsy mandringana avy hatrany ny Egyptiana Izy fa miala nenina aminy (and15).
2-Mahery amin’ny asany Andriamanitra
Mandahatra sy manantanteraka ny asany amin’ny fotoanany ny Tompo.Toy izao no handaharany ny asany ; miteny sy mananatra ary mampianatra Izy (and 16) , manambara sy mampiomana ny amin’izay hataony (and 14), miala nenina sy mamindra fo amin’ny maditra sy ny mafy fo ary ny tsy mino (and16). Manambara izany fa manome fotoana hibebahana sy hialana nenina amin’ny mpanota Izy, mba tsy ho lany ringana ny olombelona .
3-Tompon’ny fahefana rehetra Andriamanitra
Tsy an’ny mpabjaka ny fahefana sy ny hery fa an’ Andriamanitra .Izy no mametra ny mpabjaka amin’ny fahefany (and 16) mba hahafantarany fa i Jehovah no Andriamanitra. Mifehy sy manapaka izao rehetra izao na ny hita na ny tsy hita : ny andro ho avy , ny havandra.Fahefana sy hery mamindra fo ny herin’ny Tompo .Mamindra fo sy miantra ny mafy fo. Fianarana ho antsika zanak’ Andriamanitra izany.
Fanontaniana:
Miasa ho amin’ny inona ny fahefana anananao?
Ho an’Andriamanitra irery ihany ny voninahitra. Amen !