5 Fa ankehitriny mankany amin’ izay naniraka Ahy Aho, ary tsy misy aminareo manontany Ahy hoe: Hankaiza Ianao?6 Fa satria nilaza izany taminareo Aho, dia vonton’ alahelo ny fonareo.7 Fa Izaho milaza ny marina aminareo; mahatsara anareo ny fialàko; fa raha tsy hiala Aho, dia tsy ho avy atỳ aminareo ny Mpananatra; fa raha handeha Aho, dia hirahiko ho atỳ aminareo Izy.8 Ary raha tonga Izy, dia hampiaiky izao tontolo izao ny fahotana sy ny fahamarinana ary ny fitsarana:9 ny fahotana, satria tsy mino Ahy izy;10 ny fahamarinana, satria mankany amin’ ny Ray Aho, ka tsy mahita Ahy intsony ianareo;11 ny fitsarana, satria ny andrianan’ izao tontolo izao dia efa voatsara.
JAONA 16 :5-11
ILAY MPANANATRA HIRAHIN’I JESOA KRISTY
Handao ny mpianatra ny Tompo. Mampanantena ny haniraka ny mpananatra ho eo amin’ny mpianany Izy .
1-Miasa eo amin’ny fiainan’ny mpianatra
Antsoina hoe: « mpananatra » eto ny Fanahy Masina izay hirahin’i Jesoa Kristy ho eo amin’ny mpianatra. Ny Mpananatra izay azo adika ihany koa hoe: mpampianatra , mpampahery , solo-vava. Azo lazaina fa na dia handao ny mpianatra aza ny Tompo dia tsy mamela azy ireo ho irery izy. Ny fanirahany ny Fanahy Masina dia mampiseho fa tena akaiky, monina eo amin’ny fiainan’ny mpianany Izy. Izy ihany amin’ny alalan’ny Fanahy Masina nomeny no tohana sy hery ho an’ny mpianatra amin’ny fanohizana ny asany.
2-Miasa eo amin’ny fiainan’izao tontolo izao
Rehefa miasa sy mitarika ny Fanahy Masina dia hihavao ny fiainan’izao tontolo izao. Miasa amin’ny fiainan’izao tontolo izao tokoa mantsy izany mpananatra izany. Ho tsapan’izao tontolo izao ny maha- mpanota azy noho izy ireo tsy nanaiky, tsy nino an’ i Jesoa Kristy. Ho fantany ny asan’ Andriamanitra tao amin’i Jesoa ny rehetra. Eny, ho tsapan’ireo izay tsy nino an’i Jesoa Kristy ihany koa fa ny fitsanganan’i Jesoa Kristy tamin’ny maty dia faharesena ho an’izao tontolo izao sy ny asa ratsiny .Tsarovy fa te-hanavao ny fiainanao ny Tompo.
Fanontaniana:
Manao ahoana ny fiainan’ny olona manaiky ny asan’ny Fanahy Masina ?
Ho an’Andriamanitra irery ihany ny voninahitra. Amen !