7 Fa antomotra ny faran’ ny zavatra rehetra; koa hendre ka mahonòna tena ho amin’ ny fivavahana.8 Ary mihoatra noho ny zavatra rehetra, mifankatiava tsara; fa « ny fitiavana manarona fahotana maro »9 Mifampiantranoa, ka aza mimonomonona.10 Samia mifanompo araka ny fanomezam-pahasoavana izay noraisinareo, dia tahaka ny mpitandrina tsara ny fahasoavana maro samy hafa izay an’ Andriamanitra.11 Raha misy olona miteny, dia aoka izy hiteny toy ny milaza tenin’ Andriamanitra, raha misy olona manompo, dia aoka izy hanao izany araka ny hery izay omen’ Andriamanitra azy; mba hankalazana an’ Andriamanitra amin’ ny zavatra rehetra amin’ ny alalan’ i Jesoa Kristy; fa Azy ny voninahitra sy ny fanjakana mandrakizay mandrakizay. Amena.
1 PETERA 4 :7-11
MANÀNA FAHENDRENA EO AM-PIANDRASANA NY TOMPO
Miandry amin’ny fanantenana ny fiavian’ny Tompo isika fiangonany sy ny kristiana. Mazava ny hafatra ho antsika eo am-piandrasana ny Tompo : « hendre ka mahonona tena amin’ny fivavahana ». Mitaona antsika hamantatra ny fomba fiaina « pratika » amin’ny maha-mpino kristiana izany. Ireto no itaomana antsika :
1-Mifankatiava tsara :
Fandre matetika io. Na i Jesoa aza dia nanafatra fa ny fifankatiavana na ny fitia mifamaly noraisintsika avy Aminy no hahafantarana sy hahazontsika mijoro ho vavolombelona fa mpianatr’i Kristy isika .Miezaha hatrany hitia fa aza mitomany hotiavina fotsiny . Izany no fahendrena kristiana.
2-Mifanompoa araka ny fanomezam-pahasoavana
Ny hoe : « manompo » dia mikarakara ny hafa na manome fotoana hanafam-pahasahiranana ny hafa, ka mampisitraka azy izay ilainy eo amin’ny fiainany andavanandro .Ampirisihana ny mpino hanao toy izany. Ny fananana sy ny fahaiza-manao nomen’ny Tompo antsika avy no ento manatanteraka izany. Ny fanomezam-pahasoavana na fahaiza-manao nomen’ny Tompo anao dia tsy nomeny hampandrosoanao ny tenanao fa ny hafa sy ny fiangonana. Koa andeha isika hamerina ny fiainan’ny fiangonana voalohany indray, ka hifanompo tokoa amin’izao andron’ny « samy maka ho azy » izao.
Ho an’Andriamanitra irery ihany ny voninahitra. Amen !