1 Ary ny mpamory hetra rehetra sy ny mpanota nanatona hihaino an’ i Jesoa.2 Dia nimonomonona ny Fariseo sy ny mpanora-dalàna ka nanao hoe: Ilehity mandray ny mpanota ka miara-mihinana aminy.3 Fa Izy nanao izao fanoharana izao taminy hoe:4 Iza moa no olona aminareo, izay manana ondry zato, ka very ny anankiray, no tsy mandao ny sivy amby sivi-folo any an-efitra ka mandeha hitady ilay very mandra-pahitany azy?5 ary rehefa hitany iny, dia ataony eo an-tsorony, ka dia faly izy;6 ary rehefa tonga ao an-trano izy, dia mamory ny sakaizany sy ny namany ka manao aminy hoe: Avia hiara-mifaly amiko; fa efa hitako ilay ondriko very.7 Lazaiko aminareo fa hisy fifaliana toy izany any an-danitra ny amin’ ny mpanota iray izay mibebaka noho ny amin’ ny olona marina sivy amby sivi-folo, izay tsy misy tokony hibebahany.
LIOKA 15 :1-7MAHAFALY NY TOMPO NY FIBEBAHANA
1-Manatona ny Tompo ny olona mibebaka
Famaritana omen’ny Soratra masina eto fa ny fanatonana an’i Jesoa Kristy no tena fibebahana marina. Manapa-kevitra ireo mpamory hetra sy ny mpanota « nanatona hihaino an’i Jesoa » (and 1). Raisiny sy asandrany izay manatona sy mihaino ny teniny : « ataony eny an-tsorony » (and 5). Mahafaly an’i Jesoa ny mahita indray ny ondriny very, dia ny mpanota mibebaka. Tsy menatra izay manatona Azy i Jesoa. Tokana aman-tany ny olona tsirairay : tian’ i Jesoa ka tsy maintsy mitady azy ireo Izy.
2-Mitady ny very ny Tompo
Maro ny olom-boavonjy, fa tena sarobidy amin’ny Tompo ny anankiray very amin’ny ondriny. Hamonjy ny olona rehetra mpanota sy very no antony manokana nidinan’ Andriamanitra tety an-tany, tamin’ny alalan’i Jesoa Kristy. Mitady ny maditrany i Jesoa. Tsy misy manana hevitra sy ho afaka mamonjy ny mpanota afa-tsy i Jesoa irery ihany. Manan-danja sady sarobidy amin’i Jesoa ny olombelona. Mitady sy manangona ny very Izy.
3-Mifaly miaraka amin’ny Tompo any an-danitra
Miombom-pifaliana ny mponina any an-danitra rehefa mibebaka ny mpanota. Mampiray fifaliana ety an-tany sy any an-danitra ny fibebahana ao amin’i Jesoa Kristy. Isan’ny làlana hahatongavan’ny mpanota any an-danitra ny fibebahana. Mahita antsika ny Tompo ao amin’ny fibebahana marina tokoa.
Fanontaniana:
Tena mifaly amin’ny fibebahan’ny olona iray tokoa ve ny fiangonana ? Manomeza ohatra.
Ho an’Andriamanitra irery ihany ny voninahitra. Amen !