20 Ary nony maraina, raha nandalo izy, dia hitany fa efa nalazo hatramin’ ny fakany ilay aviavy.21 Ary Petera nahatsiahy ka nanao taminy hoe: Raby ô, indro fa efa malazo ilay aviavy nozoninao.22 Ary Jesoa namaly ka nanao taminy hoe: Manàna finoana an’ Andriamanitra.23 Lazaiko aminareo marina tokoa: Na zovy na zovy no hilaza amin’ ity tendrombohitra ity hoe: Mifindrà, ka mianjerà any an-dranomasina, ka tsy hiahanahana ao am-pony, fa hino fa ho tonga ny zavatra lazainy, dia ho azony izany.24 Koa lazaiko aminareo: Na inona na inona tononinareo amin’ ny fivavahana sy angatahinareo, dia minoa fa efa nandray hianareo, dia ho azonareo izany.
MARKA 11 :20-24NY VAVAKA MAHAFINDRA TENDROMBOHITRA
1-Vavaka amin’ny finoana
Tsy ny fahamainan’ilay aviavy no zava-dehibe amin’i Jesoa fa ny anjara toeran’ny finoana ao amin’ny vavaka . Asehon’i Jesoa ihany koa ny fahefana ananan’ny mino ka hanesorana izay sakatsakana sy ny tsy fahombiazana. Manàna finoana an’ Andriamanitra, hoy i Jesoa Kristy (and 22). Esorina ny fisalasalana mba ho tanteraka izay zavatra lazaina sy angatahina amin’ny Tompo (and 23). Manambara izany fa ny finoana no mampanan-kery ny vavaka. Ny finoana no hanatonana an’i Jesoa ao amin’ny vavaka, satria « raha tsy amin’ny finoana dia tsy misy azo atao hahazoana sitraka aminy » (Heb 11 :6).
2-Vavaka mamaha olana
Mampaka sy mampamaha ny zana-boriky i Jesoa (and 2) ary niditra tao Jerosalema amin’ny maha- Mesia Azy (and 8) ka nodioviny ny tempoly. Amin’ny fisehon’i Jesoa amin’ny maha- Mesia Mpanjaka sy Mpamonjy Azy dia miharihary ny heriny sy ny fahefany. Ravan’i Jesoa izay sakana rehetra tsy hahatanteraka ny famonjena. Tahaka ity aviavy nozoniny fa tsy nahitana voany. Manome izany fahefana izany ho an’ny mpianany sy ny mpino Azy i Jesoa Kristy. Manan-kery avy amin’ny Tompo ny mpino hanala izay sakana tsy hahatanteraka ny famonjena izao tontolo izao. Amin’ny alalan’ny vavaka no hahafahantsika manala ny tendrombohitra misakana ny famonjena.
Fanontaniana:
Inona avy ireo lazain’ny Tompo fa tendrombohitra tokony hafindra eo amin’ny fiainantsika ?
Ho an’Andriamanitra irery ihany ny voninahitra. Amen !