21 Aza mampahory ny mpitondratena sy ny kamboty akory ianareo.22 Fa raha mampahory azy na amin’ inona na amin’ inona ianao, ka mitaraina Amiko izy, dia hihaino ny fitarainany tokoa Aho,23 ka hirehitra ny fahatezerako, ary hamono anareo amin’ ny sabatra Aho; dia mba ho mpitondratena ny vadinareo, ary ho kamboty kosa ny zanakareo.24 Raha mampisambo-bola ny oloko izay malahelo eo aminao ianao, dia tsy ho toy ny mpampanana vola aminy; fa tsy hampandoa zana-bola azy ianao.25 Raha maka ny lamban’ ny namanao ho tsatòka ianao, dia hampodinao aminy izany, raha mbola tsy milentika ny masoandro.26 Fa izany ihany no firakofany sady fitafiany amin’ ny hodiny, ka inona no ho entiny mandry? ary raha mitaraina Amiko izy, dia hohenoiko, fa mamindra fo Aho.
EKSODOSY 22 :21-26
MIANTRA NY MALAHELO ANDRIAMANITRA
1-Miantra ny mpitondrantena sy ny kamboty ny Tompo
Ny didin’ Andriamanitra dia miaro ny mahantra sy ny sahirana. Mampatezitra an’ Andriamanitra ny fampahoriana azy ireny. Mihaino ny fitarainany Andriamanitra ka mamaly ny mpampahory azy amin’ny sabatra amin’ny fahatezerany (and 24). Ny fikasan’ Andrimanitra dia ny hahasambatra ny vahoakany. Manome ny lalàna iray mba hiainan’ny vahoaka iray amin’Israely Andriamanitra mba hifampitsinjo. Tsy tian’ Andriamanitra hiverina amin’ny fanandevozana tany Egypta ny olony. Tsy hifanandevo ihany koa ny samy vahoakan’ Andriamanitra, dia ny Israely izany. Tonga mahantra i Jesoa mba hiaina ny fiainan’ny mahantra sy hanambara fa Izy dia tonga hamonjy ny mahantra.
2-Manarina ny mahantra Andriamanitra
Endrika vitsivitsy no hanehoan’ny Soratra masina ny fahantrana : fisamborambola , findramana ka misy antoka na tsatoka (and 25). Omena teny izay mampisambotra tsy haka zanabola amin’ny malahelo misambotra (and 24), tsy handray tatoka na antoka ihany koa. Manana andraikitra izay manana mba hitsinjo ny mahantra sy ny mpitondrantena. Lalàna mandrindra sy mandamina ny fiaraha-monina ny didin’ Andriamanitra, mba tsy hisy malahelo eo amin’ny tanin’ Israely. Izany dia tena fivavahana ankasitrahan’ny Tompo (Jak 1.27). Mihaino ny fitarainan’ny mahantra mitaraina aminy tokoa ny Tompo ka mamindra fo aminy (and26)
Fanontaniana:
Inona no atao mba handresena ny fahantran’ny mpino?
Ho an’Andriamanitra irery ihany ny voninahitra. Amen !