19 Mihainoa ianao, anaka, ka hendre, ary ampizory amin’ ny lalana ny fonao.20 Aza misakaiza amin’ izay mpiboboka divay sy izay fatra-pitia hena;21 Fa halahelo izay mpiboboka sy izay fatra-pitia hena; ary ny fitiavan-torimaso mampitafy voro-damba.22 Maneke ny rainao izay niteraka anao. Ary aza manamavo ny reninao, saingy efa antitra izy.23 Vidio ny marina, ka aza amidy, dia ny fahendrena sy ny fananarana ary ny fahazavan-tsaina.24 Hifaly dia hifaly ny rain’ ny marina, ary izay miteraka zaza hendry hanampifaliana aminy.25 Aoka ho faly ny rainao sy ny reninao, eny, aoka ho ravoravo ny reninao izay niteraka anao.
OHABOLANA 23 :19-25
Sekolin’ny fahendrena misokatra ho an’ny zanaka rehetra ny bokin’ny Ohabolana . Manao antso mandrakariva izy mba handrosoantsika hihaino sy hianatra ny fahendrena.
1- Manàna fahendrena ho enti-miaina
Manome torohevitra amin’ny toetra tokony hananana ny Teny eto raha hoy izy : « hendre , ary ampizory amin’ny làlana ny fonao » (and 19) . Jesoa Kristy no làlana sy mpitari-dàlana antsika amin’ny tsara rehetra. Izy koa no hery sy fahendren’ Andriamanitra ka raha mandray Azy isika dia hanan-kery handavana ny ratsy rehetra. Teny fahendrena no hanome fiainana sy fiadanana ho antsika . Koa mazotoa mandray ny teny fananaran’ny Tompontsika.
2-Tehirizo ny fitondrantena mendrika
Mikolokolo ny zanany hanana fitondrantena mendrika ny raiamandreny rehetra , saingy rehefa mitombo fahalalana izy ireny indraindray dia manary ny anatra nomena . Rehefa lafo vidy tamin’ny zanaka ny fahendrena nampianarina azy dia tsy hadinony mihitsy izany . Manam-pifaliana ny raiamandreny manana zanaka hendry : manaja, manoa, mora toroana, manaiky an’i Jesoa Kristy ho Tompo sy Mpamonjy azy ary tia mivavaka. Isika raiamandreny, aoka hanatanteraka ny fanekena teo amin’ny Batisa raha te- hanana zanaka hendry.
Fanontaniana:
Tanisao ireo torohevitra nomen’ny bokin’ny Ohabolana anao.
Ho an’Andriamanitra irery ihany ny voninahitra. Amen !