1 Soraty ho amin’ ny anjelin’ ny fiangonana any Efesosy. Izao no lazain’ Ilay mihazona ny kintana fito eny an-tànany ankavanana sady mandeha eo afovoan’ ny fanaovan-jiro volamena fito:2 Fantatro ny asanao sy ny fikelezanao aina sy ny faharetanao ary ny tsi-fahazakanao izay mpanao ratsy; ary ianao efa nizaha toetra izay milaza ny tenany ho Apostoly, kanjo tsy izy, ary hitanao fa mpandainga izy;3 ary manana faharetana ianao ka niaritra noho ny anarako sady tsy reraka.4 Kanefa manan-teny aminao Aho, satria efa niala tamin’ ny fitiavanao voalohany hianao.5 Koa tsarovy izay nitoeranao fony tsy mbola lavo, dia mibebaha, ka manaova ny asa voalohany; fa raha tsy izany, dia ho avy aminao Aho ka hamindra ny fanaovan-jironao hiala amin’ ny fitoerany, raha tsy mibebaka hianao.6 Kanefa izao no toetranao: halanao ny asan’ ny Nikolaita, izay halako koa.7 Izay manan-tsofina, aoka izy hihaino izay lazain’ ny Fanahy amin’ ny fiangonana. Izay maharesy dia havelako hihinana ny avy amin’ ny hazon’ aina, izay eo amin’ ny Paradisan’ Andriamanitra.
APOKALYPSY 2 :1-7NY FIANGONANA MIANDRY NY FIAVIAN’NY TOMPO
Nahazo hafatra manokana avy tamin’ny Tompo ny fiangonana tao Efesosy . Eo am-piandrasana ny fiaviany indray dia taomina ny mpino mba:
1-Hifikitra amin’i Jesoa hatrany (and 2-4)
Noderain’ny Tompo manokana noho ny asany ny fikelezany aina , ny faharetany ary ny tsy fahazakany ny mpanao ratsy ity fiangonana ity. Nahazo fanakianana mafy kosa anefa izy noho ny fialany tamin’ilay fitiavana voalohany. Tsy inona izany fa ny tsy fisian’ny finoana an’i Jesoa Kristy intsony tahaka ny tamin’ny andro voalohany nandraisan’izy ireo ny Filazantsara. Tsy ampy noho izany ny fihetsiketsehana ivelany hahazoana sitraka amin’ny Tompo raha toa ka mihen-danja ny fitiavana Azy . Hazony mafy mba hihen-danja ny fitiavana an’i Jesoa eo am-piandrasana indray ny fiverenany.
2-Hibebaka amin’izay nananaran’ny Tompo (and 5)
Miverina matetika eto ny antso ho amin’ny fibebahana. Fiverenana amin’ny Tompo no hevitr’izany amin’ny ankapobeny. Fiantsoana ny mpino mba hihazona ny hafanampo amin’ny fitiavana an’i Jesoa kosa izany eto na inona na inona mitranga mandra-piaviny. Fahavoazana lehibe no ateraky ny tsy fibebahana eto satria very maina ny fisasarana rehetra natao tsy amin’ny fitiavana ny Tompo (Mat 7 :22-23).
Fanontaniana :
Inona no tokony hatao mba tsy hampihena ny fitiavana ny Tompo ?
Ho an’Andriamanitra irery ihany ny voninahitra. Amen !