12 Ary tamin’ izany, raha nankany Damaskosy aho, nitondra fahefana sy teny izay efa azoko tamin’ ny lohan’ ny mpisorona,13 koa nony ilay nitatao-vovonana iny ny andro, ry mpanjaka ô, dia hitako teny an-dalana fa, indro, nisy mazava avy tany an-danitra nanelatrelatra manodidina ahy mbamin’ izay niaraka tamiko mihoatra noho ny famirapiratry ny masoandro.14 Ary rehefa lavo tamin’ ny tany izahay rehetra, dia nandre feo nilaza tamiko aho nanao tamin’ ny teny Hebreo hoe: Saoly Saoly, nahoana ianao no manenjika Ahy? Zavatra sarotra aminao ny hanipaka ny fanindronana.15 Dia hoy izaho: Iza moa Ianao, Tompoko? Ary hoy ny Tompo: Izaho no Jesoa Izay enjehinao.16 Fa mitsangàna, ka mijoroa amin’ ny tongotrao; fa izao no nisehoako taminao, dia ny hanendry anao ho mpanompo sy ho vavolombelona ny amin’ izay efa nahitanao Ahy sy izay hisehoako aminao,17 hamonjy anao amin’ ny olona Isiraely sy ny jentilisa, izay anirahako anao,18 hampahiratra ny masony hialany amin’ ny maizina ho amin’ ny mazava, ary amin’ ny fahefan’ i Satana ho amin’ Andriamanitra, mba hahazoany famelan-keloka sy lova eo amin’ izay nohamasinina noho ny finoana Ahy.
ASAN’NY APOSTOLY 26 :12-18« MITSANGANA KA MIJOROA AMIN’NY TONGOTRAO » (and 16)
1-Mialà amin’ny endri-pahafatesana
« Mitsangàna!… » (And 16a). Teny mibaiko fahita ao amin’ny Soaratra masina sy fandrentsika amin’ny fanirahana mpaminany izany. Teny teo am-bavan’ny mpaminany izany. Teny teo am-bavan’i Jesoa rehefa manasitrana sy manangana ny maty (Mat 9 :25 ; Mar 5 :41) ka io fialana amin’ny fahafatesana io no hevitry ny hoe: mitsangana. Koa izay manam-piniavana hijoro ho vavolombelona dia tsy maintsy ho olona vonona sy manam-piniavana hiala amin’ny endri-pahafatesana rehetra, na olona nesorina tao amin’ny maizina sy ny fahafatesana ho amin’ny mazava sy ny fiainana (zahao and 18). Tsy izay tsy mahafoy ny toetra ratsy fanaony na tamana amin’ny fomba amam-panao mifanohitra amin’ny maha-fiangonana sy maha-kristiana no afaka hijoro ho vavolombelon’ny Tompo , fa olona tena mibebaka .
2-Aza mety hahilangilan’ny hevitra samihafa
« Mijoroa amin’ny tongotrao ». Fomba fiteny itaomana ny olona hiatrika adidy izany. Ny hevitra eto dia mizotra amin’ny hoe: Aza mety havily na ahilangilan’ny foto-kevitra samihafa. Ny Apostoly Paoly dia mpivavaka Jiosy mafana fo. Rehefa asain’ny Tompo « mijoro amin’ny tongotra »dia taomina hanadino izany hevitra sy foto-kevitra samihafa izany. Isika koa, raha tena hijoro ho vavolombelona dia aza mety hahilangilan’ny fampianarana isankarazany fa mijoroa amin’ny tongotrao.
Fanontaniana:
Moa afa-miaraka ve ny fitiavam-bola sy voninahitra ary ny fahavononana hijoro ho vavolombelona ?
Ho an’Andriamanitra irery ihany ny voninahitra. Amen !