Ny filazana ny razan’i Jesoa Kristy, zanak’i Davida, zanak’i Abrahama. 2 Abrahama niteraka an’i Isaka; ary Isaka niteraka an’i Jakoba; ary Jakoba niteraka an’i Joda mirahalahy avy ; 3 ary Joda niteraka an’i Fareza sy Zara tamin’i Tamara ; ary Fareza niteraka an’i Jezrona ; ary Jezrona niteraka an-dRama ; 4 ary Rama niteraka an’i Aminadaba ; ary Aminadaba niteraka an’i Nasona ; ary Nasona niteraka an’i Salmona ; 5 ary Salmona niteraka an’i Boaza tamin-dRahaba ; ary Boaza niteraka an’i Obeda tamin-dRota ; ary Obeda niteraka an’i Jese ; 6 ary Jese niteraka an’i Davida mpanjaka. Ary Davida niteraka an’i Solomona tamin’ny vadin’i Oria ; 7 ary Solomona niteraka an-dRehoboama ; ary Rehoboama niteraka an’i Abia ; ary Abia niteraka an’i Asa ; 8 ary Asa niteraka an’i Josafata ; ary Josafata niteraka an’i Jorama ; ary Jorama niteraka an’i Ozia ; 9 ary Ozia niteraka an’i Ahaza ; ary Ahaza niteraka an’i Hezekia ; 10 ary Hezekia niteraka an’i Manase; ary Manase niteraka an’i Amona ; ary Amona niteraka an’i Josia ; 11 ary Josia niteraka an’i Jekonia mirahalahy avy, tamin’ny nifindrana tany Babylona. 12 Ary taorian’ny nifindrana tany Babylona Jekonia dia niteraka an’i Sealtiela ; ary Sealtiela niteraka an’i Zerobabela ; 13 ary Zerobabela niteraka an’i Abihoda ; ary Abihoda niteraka an’i Eliakima ; ary Eliakima niteraka an’i Azora ; 14 ary Azora niteraka an’i Akima ; ary Akima niteraka an’i Elihoda ; 15 ary Elihoda niteraka an’i Eleazara ; ary Eleazara niteraka an’i Matana ; ary Matana niteraka an’i Jakoba ; 16 ary Jakoba niteraka an’i Josefa, vadin’i Maria ; ary Maria niteraka an’i Jesoa, Izay atao hoe Kristy. 17 Ary ny taranaka rehetra hatramin’i Abrahama ka hatramin’i Davida dia taranaka efatra ambin’ny folo; ary hatramin’i Davida ka hatramin’ny nifindrana tany Babylona dia taranaka efatra ambin’ny folo; ary hatramin’ny nifindrana tany Babylona ka hatramin’ny Kristy dia taranaka efatra ambin’ny folo.
MATIO 1 :1-17

NY POROFO NY MAHA- MESIA AN’I JESOA

Ny Filazantsara araka ny Matio no boky voalohany ao amin’ny Testamenta Vaovao. Izy no tetezana mampitohy ny Testamenta Taloha amin’ny Vaovao. Tonga mitohy ny Baiboly manontolo noho ny Filazantsara araka an’i Matio. Na dia tsy boky voasoratra voalohany aza izy dia izy no natao voalohany eo amin’ny Testamenta Vaovao. Matio dia niezaka nandresy lahatra ny Jiosy toa azy fa Jesoa no Mesia. Antony iray nanombohany ny fitantarana ny amin’i Jesoa amin’ny alalan’ny tetiharany izany. Matio koa dia niezaka nanome lanja ny vehivavy ka nampidiriny eo amin’ny tetiharan’i Jesoa Maria.Misy hevitra voizin’ny mpanoratra ao ambadiky ny tetiarana toy izao. Matio manokana dia maneho ny :

1-Fahatanterahan’ny teny fikasana

Ny filazana avy hatrany fa i Jesoa no « Kristy zanak’i Davida, zanak’i Abrahama » dia manoporofo mazava, fa tanteraka ao Aminy ireo teny fikasana sy faminaniana maro samihafa momba ny Mesia, izay hita ao amin’ny Testamenta Taloha. Ny maha- zanak’i Abrahama dia maneho fa i Jesoa no loharanon’ny fitahiana ho an’ny firenena rehetra ambonin’ny tany (Gen 12.3). Ny maha-zanak’i Davida dia midika fa mpanjaka ankasitrahan’Andriamanitra hanjaka mandrakizay Izy (Sal 132.11), ary i Kristy dia manambara fa i Jesoa no fahatnterahan’ny famonjen’ Andriamanitra.

2-Fahaterahana ho an’izao tontolo izao

Anaram-behivavy dimy no hita ato amin’izao tetiarana izao ary endri-pifandraisana tsy ara-dalàna teo amin’ny fiaraha-monina avokoa no nahazoan’izy ireo zanaka (Tamara, Rahaba, Rota, vadin’i Oria, Maria). Asehon’i Matio eto anefa fa anisan’ny nandray anjara mivantana tamin’ny fiavian’i Jesoa Ilay Mesia izy ireo. Araka izany dia mazava fa manana anjara ao amin’i Jesoa avokoa izao tontolo izao ary Izy mihitsy aza moa no nilaza fa « tsy tonga hiantso ny marina, fa ny mpanota » (Mat 9.13). Koa andeha isika hanatona Azy sy hanaiky hateraka indray mba handraisantsika ny famonjen’i Jesoa Mesia.

Ho an’Andriamanitra irery ihany ny voninahitra.