28 Koa aoka ho fantatrareo fa izao famonjen’ Andriamanitra izao dia nampitondraina ho any amin’ ny jentilisa, ary izy hihaino azy.30 Ary Paoly nitoetra roa taona ngarangidina tao an-trano nohofany ka nandray tsara izay rehetra nankeo aminy,31 dia nitory ny fanjakan’ Andriamanitra ka nampianatra ny amin’ i Jesoa Kristy Tompo tamin’ ny fahasahiana be, ary tsy nisy fisakanana.
ASA 28 :28-31

NY  OLOM-BOAFIDIN’ ANDRIAMANITRA

1-Manambara  fa ho an’ny olona rehetra ny famonjena 

Na dia efa  nifatotra noho  ny amin’ny fitoriana ny Filazantsara aza i Paoly  Apostoly  dia tsy  nitsahatra nanatanteraka  ny asa nifidianan’ Andriamanitra   azy . Eto  izy dia manao  fanambarana  lehibe fa nanana anjara  amin’ny famonjena  notanterahin’ Andriamanitra tao amin’i Jesoa Kristy  koa na dia ny jentilisa aza. Midika izany  fa tsy manavaka  Andriamanitra , ny olona rehetra no sitrak’ Andriamanitra  ho ao amin’ny famonjeny  , handray  ny fiainana omeny  . Mampianatra antsika koa izany hilaza , hijoro ho vavolombelona amin’ny manodidina antsika fa tian’ Andriamanitra handray  ny famonjena ihany koa izy .

2-Mitory  hatrany ny Filazantsara  

Niharan’ny fanenjehana maro samihafa  i Paoly  Apostoly  tamin’ny fotoana nanatanterahany  ny Asa fitoriana  ny Filazantsara . Miharihary  eto fa tsy nahasakana azy hijoro  hatrany ho vavolombelon’ilay  niantso  sy nifidy  azy  izany . Voalaza eto  fa nanohy  hatrany  nitory  ny Filazantsaran’ny fanjakan’ Andriamanitra  izy  , nampianatra  ny olona  ny amin’i Jesoa Kristy  sy ny famonjena notanterahiny . Zava-dehibe  taminy  ny fitaomana  ny olona rehetra  hahalala ny fitiavan’ Andriamanitra ka hanaiky  an’i Jesoa Kristy ho Mpamonjy  azy  . Tsarovy fa ny olom-boafidin’ Andriamanitra dia tsy  mihemotra fa mandroso  hatrany  mijoro  ho vavolombelon’ilay namonjy azy .

Fanontaniana :

Nahoana no tsy mihemotra ny mpitory  ny Filazantsara  fa mandroso  hatrany  na dia  misy mpanenjika aza ?

Ho an’Andriamanitra irery ihany ny voninahitra. Amen !