17 Ary nitsangana ny mpisoronabe mbamin’ ny namany rehetra (izay antokon’ ny Sadoseo), fa feno fialonana izy,18 dia nisambotra ny Apostoly izy ka nanao azy tao an-trano-maizina.19 Fa nisy anjelin’ ny Tompo namoha ny varavaran’ ny trano-maizina nony alina, dia nitondra azy nivoaka ka nanao hoe:20 Mandehana, ka mitsangàna, ary mitoria amin’ ny vahoaka eo an-kianjan’ ny tempoly ny teny rehetra milaza izany fiainana izany.21 Ary rehefa nandre izany izy, dia niditra maraina koa teo an-kianjan’ ny tempoly ka nampianatra. Ary rehefa tonga ny mpisoronabe sy ny namany, dia nampiangona ny Synedriona sy ny loholona rehetra tamin’ ny Zanak’ isiraely izy ka naniraka nankao amin’ ny trano-maizina haka ny Apostoly.22 Fa nony tonga ny mpiandry raharaha, dia tsy nahita azy tao an-trano-maizina; dia niverina izy ka nilaza hoe:23 Ny trano-maizina dia hitanay mihidy tsara, ary ny mpiambina mitsangana eo am-baravarana; kanefa nony novohanay, dia tsy nahita olona tao izahay.24 Ary ny lehiben’ ny mpiambina ny tempoly sy ny lohan’ ny mpisorona, rehefa nandre izany teny izany, dia niroahana ny amin’ izay ho faran’ izany.25 Dia nisy tonga ka nilaza taminy hoe: Ireny lehilahy izay nataonareo tao an-trano-maizina ireny, dia indreo izy mitsangana eo an-kianjan’ ny tempoly ka mampianatra ny olona.26 Dia lasa ny lehiben’ ny mpiambina sy ny mpiandry raharaha ka nitondra azy, nefa tsy nanao mahery, satria natahotra ny vahoaka izy, fandrao hotorahany vato.27 Ary rehefa nentiny, dia napetrany teo anatrehan’ ny Synedriona ireo, ary ny mpisoronabe nanontany azy28 ka nanao hoe: Efa noraranay mafy dia mafy hianareo tsy hampianatra amin’ izany anarana izany; kanjo, indro, efa nofenoinareo ny fampianaranareo Jerosalema, ka tianareo hankinina aminay ny ran’ izany Lehilahy izany.29 Fa Petera sy ny Apostoly namaly ka nanao hoe: Andriamanitra no tokony hekena mihoatra noho ny olona.30 Andriamanitry ny razantsika efa nanangana an’ i Jesoa, Izay novonoin’ ny tananareo nahantonareo teo amin’ ny hazo.31 Izy nasandratry ny tanana ankavanan’ Andriamanitra ho Tompo sy Mpamonjy, hanome fibebahana sy famelan-keloka ho an’ ny Isiraely.32 Ary izahay dia vavolombelon’ izany zavatra izany, ary ny Fanahy Masina koa, Izay efa nomen’ Andriamanitra ny manaiky Azy.
ASAN’NY APOSTOLY 5 :17-32
MIARA-DÀLANA AMIN’NY VAVOLOMBELONY NY TOMPO
Matetika dia ny fanenjehana na ny tahotra sy ny fandrahonana no mahatonga ny maro tsy ho sahy hijoro ho vavolombelona. Hitantsika eto fa nisy tamin’ireo Apostoly no naiditra am-ponja. Tokony hiomana ho amin’ny zava-tsarotra toy izany izay rehetra manaiky ho iraky ny Tompo. Amin’izany dia matokia fa tsy hamela antsika ho irery ny Tompo :
1-Manafaka amin’ny fatorana izy (and 19)
Niditra an-tsehatra mivantana ny Tompo tamin’ny alalan’ny anjeliny ka namoha ny varavaran’ny fonja ary namoaka ny Apostoly (and19). Tsarovy fa tsy faly amin’ny fijoroantsika ho vavolombelon’ny Tompo ny devoly ka manao izay fomba rehetra hanakanana antsika mba tsy hitory sy hanambara amin’ny olona ny momba an’i Jesoa . Mety hampiasa fahefana izy amin’izany hamoretana antsika nefa amin’izany rehetra izany dia manoatra noho ny mpandresy isika amin’ny alalan’ilay tia antsika, dia i Jesoa Kristy .Amin’ny fotoan-tsarotra indrindra no hanehoan’ny Tompo ny Voninahiny . Koa aza menatra ny ho vavolombelon’ny Tompontsika.
2-Mampahery Izy (and 20,29)
Tsy mora akory ny zava-nihatra tamin’ny Apostoly manoloana ny fandrarana sy ny fandrahonana ary ny fanagadrana sy ny fiampangana azy. Ny mahagaga dia izao : toa arakaraka ny andrarana azy no vao mainka mitombo ny hery sy ny fahasahiana ao anatiny. Izany no tsapa rehefa miaraka amin’ny Tompo : sahy miteny, tsy matahotra fandrahonana . Fa hoy i Jesoa : « … indro Izaho momba anareo mandrakariva… » (Mat 28 :20b).
Fanontaniana:
Inona no olana efa mba nosedrainao tamin’ny fanarahanao ny Tompo ?
Ho an’Andriamanitra irery ihany ny voninahitra. Amen !