1 Koa amin’ izany dia tsy manan-kalahatra ianao, ralehilahy, na zovy na zovy ianao izay mitsara; fa izay itsaranao ny sasany no anamelohanao ny tenanao koa, fa ianao izay mitsara aza dia mba manao izany ihany koa.2 Nefa fantatsika fa ny fitsaran’ Andriamanitra dia araka ny marina amin’ izay manao toy izany.3 Ary ianao, ralehilahy, izay mitsara ny manao izany, kanefa manao izany koa ny tenanao, moa ataonao va fa ho afa-mandositra ny fitsaran’ Andriamanitra ianao?4 Sa hamavoinao ny haren’ ny fahamoram-panahiny sy ny fandeferany ary ny fahari-pony, satria tsy fantatrao fa ny fahamoram-panahin’ Andriamanitra dia mitaona anao hibebaka?5 Fa ny ditranao sy ny fonao tsy mibebaka no iraketanao fahatezerana ho anao amin’ ny andro fahatezerana sy fampisehoana ny fitsarana marin’ Andriamanitra,6 Izay hamaly ny olona rehetra araka ny asany avy:7 ho an’ izay maharitra manao soa mandrakariva ka mitady voninahitra sy laza ary tsi-fahafatesana, dia fiainana mandrakizay;8 fa ho an’ izay mitady ny ho an’ ny tenany ihany kosa sady tsy manaraka ny marina, fa manaraka ny tsy marina, dia fahavinirana sy fahatezerana,9 eny, fahoriana sy fahantrana ho an’ ny fanahin’ ny olona rehetra izay manao ratsy, amin’ ny Jiosy aloha, dia vao amin’ ny jentilisa koa;10 fa voninahitra sy laza ary fiadanana kosa ho an’ ny olona rehetra izay manao ny tsara, amin’ ny Jiosy aloha, dia vao amin’ ny jentilisa koa.11 Fa tsy misy fizahan-tavan’ olona amin’ Andriamanitra.
ROMANA 2 :1-11
NY FITSARAN’ ANDRIAMANITRA
Tsy mba manavaka Andriamanitra. Na iza na iza manao ny tsy marina eo anatrehany dia iharan’ny fitsarany avokoa. Toe-javatra fahita matetika ny fahitana olona iray mitsara na manameloka ny namany heverina ho nanao ny tsy mety. Tsarovy fa isika dia tsy afa-miala amin’ny fitsarana ataon’ Andriamanitra.
2-Manam-paharetana Andriamanitra
Fitiavana Andriamanitra. Noho izany dia tsy mampihatra ny fitsarany avy hatrany amin’ny fahotana ataon’ny olona Izy. Manana ny fotoanany voatendriny amin’ny famaliana sy ny fitsarana araka ny ataon’ny olona tsirairay Izy. Izany dia fanomezana fotoana ho an’ny olona mba hibebahany hialany amin’ny làlan-dratsy.
3-Mitsara marina araka ny ataon’ny olona Izy
Tsy avelan’ Andriamanitra ho afa-maina ny mpanao ratsy. Rehefa tsy manaiky hibebaka hiala amin’ny fahotana ny olona dia ho tonga tokoa ny famaliana araka izay nataon’ny olona . Ny mpanao ratsy hiharan’ny fampahoriana fa ireo manao ny tsara kosa handray fahasoavana (and 9,10).
Fanontaniana:
Mitondra inona ho anao ny fahafantarana fa mbola hotsarain’ Andriamanitra araka ny natao ny olona
Ho an’Andriamanitra irery ihany ny voninahitra. Amen !