33 Koa ankehitriny aoka Farao hizaha lehilahy manan-tsaina sady hendry ka hanendry azy hanapaka ny tany Egypta.34 Aoka hanao izany Farao, ary aoka izy hanendry mpikarakara hitandrina ny tany sy hamory ny ampahadimin’ ny vokatry ny tany Egypta amin’ ny taon-jina fito.35 Ary aoka izy ireo hanangona ny hanina rehetra amin’ ireo taona tsara ho avy ireo ka hamory vary be amin’ ny anaran’ i Farao ho fihinana any amin’ ny tanàna maro, ka aoka hitahiry izany izy36 Ary aoka izany hanina izany hotehirizina ao amin’ ny tany ho amin’ ny fito taona mosarena, izay ho tonga amin’ ny tany Egypta, mba tsy ho simban’ ny mosary ny tany.37 Ary sitrak’ i Farao sy ny mpanompony rehetra izany hevitra izany.38 Dia hoy Farao tamin’ ny mpanompony: Hahita lehilahy tahaka io, izay manana ny Fanahin’ Andriamanitra ao anatiny, va isika?39 Ary hoy koa Farao tamin’ i Josefa: Satria efa nampahafantarin’ Andriamanitra anao izany rehetra izany, dia tsy misy lehilahy manan-tsaina sady hendry tahaka anao;40 koa ianao no hanapaka ny ato an-tranoko, ary araka ny teninao no hitondrana ny oloko rehetra; ny seza fiandrianana ihany no hahalehibe ahy noho ianao.
GENESISY 41 :33-40
MENDRIKA NY OLON-KENDRY
Toy ny fampiharana ny Mofonaina omaly ny tantaran’i Josefa. Nijaly sy niharam-pahoriana, kanefa tonga nandresy tamim-boninahitra. Kihon-dàlana namoahana azy avy amin’ny fahoriana ho amin’ny fandresena ity voalazan’ny Mofonaina androany ity.
1-Tendrena sy tolorana andraikitra
« … Aoka i Farao hizaha lehilahy manan-tsaina sady hendry ka hanendry azy hanapaka ny tany … » (and 33). Ny hendry sy ny manan-tsaina no mendrika handray andraikitra sy tolorana adidy. Na dia isika Malagasy aza dia milaza hoe: « ny adidy tsy an’olon-dratsy ». Tsy ahafahana mitondra, na manapaka ny tany ny fahaizana amam-pahalalana fotsiny, fa ny manan-tsaina sady hendry. Tsy ny manam-pahaizana amam-pahalalana no mampahantra antsika fa ny tsy fananantsika olon-kendry. Koa manàna fahendrena mba hahazoantsika mandray andraikitra. Ahoana ny hananana izany?
2-Noho ny asan’ny Fanahy
Voatendry ho amin’ny andraikitra ambony i Josefa satria hita tao aminy ny fahendrena noho ny fananany ny Fanahin’ Andriamanitra (and 38). Ny Fanahin’ny fahendrena izay napetraky ny Tompo tao amin’ i solofon’i Jese, dia i Jesoa Kristy (Isa 11,2) no angataho araka ny toro-làlana ao amin’ny Efes 1.17 mba hahatonga antsika ho mpino tomponandraikitra.
Fanontaniana:
Moa misy toro-làlana ve azo raisitsika avy amin’izao hafatra izao, rehefa mifidy tomponandraikitra?
Ho an’Andrimanitra irery ihany ny voninahitra. Amen !