23 Dia hoy Jehovah tamin’ i Mosesy: Nihafohy va ny tànan’ i Jehovah? ankehitriny dia ho hitanao na ho tanteraka aminao ny teniko, na tsia.24 Dia nivoaka Mosesy ka nilaza ny tenin’ i Jehovah tamin’ ny olona; dia nanangona fito-polo lahy tamin’ ny loholon’ ny firenena izy ka nampitoetra azy manodidina ny trano-lay.25 Ary nidina teo amin’ ny rahona Jehovah ka niteny taminy, dia nangalany ny Fanahy izay tao amin’ i Mosesy ka napetrany tao amin’ ny loholona fito-polo lahy; ary raha mbola nitoetra tao aminy ny Fanahy, dia naminany izy, nefa tsy nanao intsony.26 Fa nisy roa lahy nijanona teo an-toby, Eldada no anaran’ ny anankiray, ary Medada no anaran’ ny anankiray; ary ny Fanahy nitoetra tao aminy; ary isan’ izay voasoratra izy roa lahy, nefa tsy mba nankeo amin’ ny trano-lay; dia naminany teo an-toby izy roa lahy.27 Ary nisy zatovo nihazakazaka, dia nilaza tamin’ i Mosesy ka nanao hoe: Eldada sy Medada maminany etsy an-toby.28 Dia namaly Josoa, zanak’ i Nona, izay nanompo an’ i Mosesy hatry ny fony tanora, ka nanao hoe: Ry Mosesy, tompoko, rarao izy roa lahy.29 Fa hoy Mosesy taminy: Izaho va no ialonanao? enga anie ka ho mpaminany avokoa ny olon’ i Jehovah rehetra, ka halatsak’ i Jehovah aminy ny Fanahiny!
NOMERY 11 :23-29
MANOME NY FANAHINY NY TOMPO
1-Amin’ny olomboafidiny
Mifidy ny mpiara-manompo amin’i Mosesy i Jehovah. Ireo loholona nantsoin’i Mosesy tamin’Israely no nomeny ny Fanahiny. Tsy ny olona rehetra tamin’izany no omen’ny Tompo ny Fanahy Masina fa ny mpitarika ny fiangonana tamin’izany. Malalaka amin’ny fanomezany ny Tompo. Teo an-toby no nanomezany azy ny Fanahy Masina ho an’ireo fitipolo lahy, fa misy koa tany amin’ny trano na ny lay nisy azy dia i Eldada sy Medada. Malalaka amin’ny fomba fiasany Andriamanitra fa tsy azontsika faritana sy ferana. Tsy azon’i Josoa ny hevitry ny Tompo ka nanome tsiny an’i Mosesy izy (and 28).
2-Amin’ny mpaminany
Rehafa miatrika olana i Mosesy dia manome vaha-olana ny Tompo. Omena mpaminany hiara-manompo aminy i Mosesy. Ny mpaminany dia mpitondra ny Tenin’ Andriamanitra. Mpitarika ny israely hanao ny sitrapon’ Andriamanitra, antsoina ihany koa hoe : « mpanompon’ny Tenin’ Andriamanitra » izy, tsy vitan’ny olona iray ny mitarika olona ho amin’ Andriamanitra sy mitondra azy ho any Kanana, mampitombo isa ny mpaminany hanampy an’i Mosesy hampianatra sy hampita ny Teniny sy hitopndra vahaolana eo amin’ny vahoakan’ Andriamanitra. Teny fikasany ny hanome ny Fanhiny ho an’ny olona rehetra mino Azy (and 29).
Ho an’Andriamanitra irery ihany ny voninahitra. Amen !