4 Nefa tsy azon’ i Joaba sy ny komandin’ ny miaramila nolavina ny tenin’ ny mpanjaka. Ary Joaba sy ny komandin’ ny miaramila nivoaka avy teo anatrehan’ ny mpanjaka handamina ny lehilahy amin’ ny Isiraely.5 Ary nita an’ i Jordana izy ireo ka nitoby tao Aroera eo ankavanan’ ilay tanàna afovoan’ ny lohasahan-driak’ i Gada, dia nankany Jazera.6 Dia tonga tany Gileada izy, tany amin’ ny tamin’ i Tatima-hodsy, dia tonga tany Danajana izy, ka nanodidina hatrany Sidona,7 ary tonga tao Tyro, tanàna mimanda, sy tany amin’ ny tanànan’ ny Hivita sy ny Kananita rehetra, ary dia nankany amin’ ny tany atsimo izay an’ ny Joda hatrany Beri-sheba izy.8 Ary nony efa nitety ny tany rehetra izy, dia tonga tany Jeroselama, rehefa afaka sivy volana sy roa-polo andro.9 Dia natolotr’ i Joaba ny mpanjaka ny isan’ ny vahoaka voalamina, ka nisy valo hetsy ny lehilahy mahery nahatan-tsabatra tamin’ ny Isiraely, ary dimy hetsy ny lehilahy tamin’ ny Joda.10 Ary ny eritreritr’ i Davida namely azy, rehefa voaisany ny olona. Ka dia hoy Davida tamin’ i Jehovah: Efa nanota indrindra aho tamin’ izao nataoko izao; koa ankehitriny mifona Aminao aho, Jehovah ô, esory ny heloky ny mpanomponao, fa efa nanao fahadalana lehibe aho.11 Ary raha nifoha maraina Davida, dia tonga tamin’ i Gada mpaminany, mpahitan’ i Davida, ny tenin’ i Jehovah nanao hoe:12 Mandehana, ka lazao amin’ i Davida hoe: Izao no lazain’ i Jehovah: Zavatra telo no apetrako eto anoloanao, koa fidio izay iray hataoko aminao.
2 SAMOELA 24 :4-12NY FIBEBAHAN’I DAVIDA
1-Fahatsiarovan-tena fa nanota
Noho ny fahatezeran’i Jehovah tamin’Israely dia nanisa ny vahoakany i Davida. Lazaina ao amin’ny tantara fa hevitra avy amin’i satana no nahatonga an’i Davida hanisa ny olona (1 Tim 21 :1). Mahatsiaro tena ho diso i Davida rehefa nandray ny tatitry ny fanisana (and 9). « Efa nanota aho », hoy i Davida. Nampaniraka ny mpitari-tafika izay efa nisalasala : « Ahoana no itiavan’ny mpanjaka tompoko hanao izany zavatra izany? » (and 3). Tsaroan’i Davida fa feno fireharehana ny fony ny amin’ny herin’ny tafika . Isan’ny lehilahy mahery no azo fa tsy ny vahoaka. Ny mpisorona sy ny Levita mpanao fanompoana aza tsy fantatra . Adinony Ilay Jehovah mahery Titoha sy manome fandresena (Sal 24 :8).
2-Fifonana amin’i Jehovah
Mety tokoa hisy asa tanteraka eo amin’ny fiangonana sy ny firenena fa tsy araka ny sitrapon’ Andriamanitra. Mitondra ho amin’ny fibebahana ny fanaovana tombana ny asa natao sy ny fandinihan-tena. Na iza na iza eo amin’Isrely dia ambany fahefan’i Jehovah avokoa. Izany no nahatongavan’ ny tenin’i Jehovah tamin’ny mpahitan’i Davida (and 11). Fianarana ho antsika ny fiaikena sy ny fifonana nataon’i Davida (and 10). Tsy miandry loza na kapoka isika na porofo vao hibebaka. Mampibebaka ny fihaonana amin’ Andriamanitra sy ny teniny. Mibebaha eo anatrehany ao amin’ny mangingina (Mat 6 :6)
Fanontaniana:
Iza na inona no mitondra antsika hibebaka ?
Ho an’Andriamanitra irery ihany ny voninahitra. Amen !