33 Jehovah ô, toroy ny lalan’ ny didinao aho; Dia hotandremako hatramin’ ny farany izany.34 Omeo fahalalana aho mba hitandrina ny lalànao; Eny, hitandrina azy amin’ ny foko rehetra aho.35 Ampandehano amin’ ny lalan’ ny didinao aho; Fa izany no sitrako.36 Amporisiho ny foko ho amin’ ny teni-vavolombelonao, Fa tsy ho amin’ ny fieremana.37 Avilio ny masoko tsy hijery zava-poana; Velomy amin’ ny lalanao aho.38 Tovy ny teninao amin’ ny mpanomponao, Izay matahotra Anao indrindra.39 Esory ny fahafaham-baraka, izay atahorako; Fa tsara ny fitsipikao.40 Indro, manina ny didinao aho, Velomy amin’ ny fahamarinanao.
SALAMO 119 :33-40Ny Salamo 119 dia maneho ny fankalazan’ny mpino ny Tenin’ Andriamanitra. Io Tenin’ Andriamanitra io rahateo no maneho ny fifandraisana lalina sy maharitra eo amin’ Andriamanitra sy ny mpino. Fifandraisana roa lafy no hita eto, ka misy ny :
1-Anjaran’ Andriamanitra
Ny tapany voalohany isaky ny andininy dia mitodika hatrany amin’ Andriamanitra. Ambara fa Andriamanitra no Tompon’ny Teny . Koa mitodina Aminy ny mpanompony. Samy entina ilazana io teny io avokoa na didy na lalàna na lalàn’ny didy na tenin’ny vavolombelona, na fitsipika . Manana anjara amin’ny fifandraisan’ny mpino amin’ Andriamanitra ny Soratra Masina. Ny vavaka no hifandraisantsika Aminy fa ny Teniny kosa no hitenenany amintsika. Koa omeo anjara toerana lehibe ny Soratra masina hampitohy hatrany ny fifandraisana .
2-Anjaran’ny olombelona
Ny tapany faharoa isaky ny andininy kosa dia maneho fahavononana feno avy amin’ny mpino amin’ny fanarahana izay ambaran’ny Soratra Masina. Ny fitozoana hatramin’ny farany amin’ny fankatoavana ny ambaran’ny Soratra masina no miantoka ny famonjena ho an’ny mpino rahatrizay. Eo am-piandrasana ny fiavian’ny Tompo dia tarihina isika tsy hamaky na hihaino fotsiny ny Soratra masina fa ho mpankato izany , satria ndrao hamitaka ny tena , hoy i Jakoba 1 :22 .
Fanontaniana :
Inona no fihetsika ataonao rehefa misy manenjika anao ?
Ho an’Andriamanitra irery ihany ny voninahitra. Amen !