12 Tsy mbola nisy olona nahita an’ Andriamanitra na oviana na oviana. Raha mifankatia isika, dia mitoetra ato amintsika Andriamanitra, ary tanteraka ato amintsika ny fitiavany.13 Izao no ahafantarantsika fa mitoetra ao aminy isika, ary Izy ato amintsika, dia ny nanomezany antsika ny Fanahiny.14 Ary izahay efa nahita ka manambara fa ny Ray efa naniraka ny Zanaka ho Mpamonjy izao tontolo izao.15 Na iza na iza manaiky fa Zanak’ Andriamanitra Jesoa, dia mitoetra ao aminy Andriamanitra, ary izy kosa ao amin’ Andriamanitra.16 Ary isika efa mahalala sy mino ny fitiavan’ Andriamanitra antsika. Andriamanitra dia fitiavana; ary izay mitoetra amin’ ny fitiavana no mitoetra ao amin’ Andriamanitra, ary Andriamanitra ao aminy.17 Izany no ahatanterahana ny fitiavana amintsika, mba hananantsika fahasahiana amin’ ny andro fitsarana; fa tahaka Azy isika eo amin’ izao tontolo izao.18 Tsy manan-tahotra ny fitiavana; fa ny fitiavana tanteraka mandroaka ny tahotra; fa mampahory ny tahotra. Fa izay matahotra dia tsy mbola tanteraka amin’ ny fitiavana.19 Isika tia, satria Izy efa tia antsika taloha.
1 JAONA 4 :12-19AIZA NO MITOETRA ANDRIAMANITRA ?
1-Ao amin’izay mifankatia (and 12b)
Andriamanitra dia fitiavana. Izao no nanehoana ny fitiavan’ Andriamanitra antsika. Andriamanitra naniraka ny zananilahy tokana tamin’izao tontolo izao, mba hahavelona antsika amin’ny alalany. Tiany hitoetra ao anatintsika izany fitiavany izany. Izany no andidiana antsika mba hifankatia satria: « raha mifankatia isika dia mitoetra ato anatintsika Andriamanitra ary tanteraka ato amintsika ny fitiavany » . Izaho sy ianao ary ireo namantsika dia samy nanehoan’ Andriamanitra ny fitiavany. Izay tsy tia dia tsy mba mahalala an’ Andriamanitra , fa Andriamanitra dia fitiavana ary izay mitoetra amin’ny fitiavana no mitoetra ao amin’ Andriamanitra ary Andriamanitra ao Aminy .
2-Ao amin’izay manaiky fa Zanak’ Andriamanitra Jesoa (and 15)
« Na iza na iza no manaiky fa Zanak’ Andriamanitra i Jesoa dia mitoetra ao aminy Andriamanitra , ary izy kosa ao amin’ Andriamanitra » . Ny hoe: manaiky Azy ho Zanak’ Andriamanitra dia finoana fa Izy no Ilay Mesia , voahosotr’ Andriamanitra . Izy no nirahina avy any an-danitra mba hanao izay hahafantaran’ny olona an’ Andriamanitra ary nanaiky hatao sorona noho ny fahotantsika. Ny olona efa nandray ny Fanahy masina no afaka hanaiky fa Zanak’ Andriamanitra Jesoa , ka tanteraka amin’ny fitiavana an’ Andriamanitra sy ny rahalahiny ary ny olona rehetra .
Fanontaniana:
Tanteraka ao aminao ve ny fitiavan’ Andriamanitra ?
Ho an’Andriamanitra irery ihany ny voninahitra. Amen