5 Fa na dia efa tonga tany Makedonia aza izahay, dia tsy hiainan’ ny nofonay, fa nampahorina tamin’ ny zavatra rehetra: teo ivelany nisy ady, tao anatiny nisy tahotra.6 Fa Andriamanitra, Izay mampionona ny mpandefitra, no efa nampionona anay tamin’ ny nahatongavan’ i Titosy,7 ary tsy tamin’ ny nahatongavany ihany, fa tamin’ ny fampiononana izay nampiononanareo azy koa, raha nambarany taminay ny fanirianareo sy ny fitomanianareo sy ny fahazotoanareo hanaiky ahy; ka dia mainka nifaly aho.8 Fa na dia nampalahelo anareo tamin’ ny epistily aza aho, dia tsy manenina intsony, na dia efa nanenina ihany aza teo; fa fantatro fa efa nampalahelo anareo izany epistily izany, kanefa vetivety ihany.9 Ary mifaly kosa aho ankehitriny, nefa tsy noho ny nampalahelovana anareo, fa noho ny nampalahelovana anareo mba hibebaka; fa nampahelovina araka an’ Andriamanitra ianareo, mba tsy hataonay matiantoka na amin’ inona na amin’ inona.10 Fa ny alahelo araka an’ Andriamanitra miasa fibebahana ho famonjena tsy hanenenana; fa miasa fahafatesana kosa ny alahelon’ izao tontolo izao.
2 KORINTIANA 7 :5-10

MAHASOA  HO  FIBEBAHANA NY  SORATRA MASINA

   1-Mampionona ny Apostoly  ny  Tompo

Ady mafy  no natrehan’ny Apostoly  tamin’ny fitoriana ny Filazantsara   sy  ny fananganana fiangonana tahaka   ny  tao   Korinto. Fahoriana   no  itoriana  sy itarihana  ny  fiangonana  hitoetra  amin’ny Tompo: ady, tahotra  (and 5). Tsy  avelan’ny  Tompo hiasa irery  sy hiraviravy tànana ny  mpanompony. Fampiononana lehibe  ny  fanirahan’ny Tompo  an’i Titosy  hanampy azy. Tahaka  izany  koa  ny  hafatra nentin’i Titosy  amin’ny fanirian’ny  fiangonana  sy ny  fanekeny  ny  Apostoly  (and 7).

2-Ny Soratra Masina tsy  anenenana

Mananatra  ny Epistily   ny Apostoly   amin’ny  fitondram-piangonana sy  fitaizana   sy ny fanabeazana  ny  kristiana  tany Korinto . Misy  ny Epistily  voalohany  talohan’ity  ka nampalahelo  ny mpino  tamin’izany  (and 8, jereo 2 Kor 2 :12-13). Ambara  fa fampalahelovana  araka  an’ Andriamanitra  ny an’ny Korintiana (and 9). Ny  fandaminana sy ny fandrindram-piangonana  dia hevitr’ Andriamanitra  hitarihana ny olona ho amin’i Kristy .

3-Ny Soratra Masina mampibebaka

Alahelon’ ny fiangonana sy ny Apostoly  no hitantsika eto. Nampibebaka , nampiova fo  sy hevitra ny Korintiana  ny soratry ny Apostoly (and 10). Niteraka  famonjena  ny fanahin’ny mpino  izany. Raiso am-pifaliana  ny Tenin’ Andriamanitra rentsika sy torina na vakina  fa  mitondra famonjena  tsy anenenana izany.

Fanontaniana:

Inona no fifandraisan’ny Soratra Masina  sy ny fandaminam-piangonana ary inona no vokany ?

Ho an’Andriamanitra irery ihany ny voninahitra. Amen !