8 Koa tandremo ny lalàna rehetra izay andidiako anareo anio, mba hahery ianareo, dia hiditra handova ny tany izay efa halehanareo holovana;9 ary, mba ho maro andro ianareo amin’ ny tany izay nianianan’ i Jehovah tamin’ ny razanareo homena azy sy ny taranany, dia tany izay tondra-dronono sy tantely.10 Fa ny tany izay efa hidiranao holovana dia tsy mba tahaka ny tany Egypta, izay nivoahanareo, izay namafazanao ny voan-javatrao sy nandeman’ ny tongotrao rano azy tahaka ny fambolen’ anana.11 Fa ny tany izay efa halehanareo holovana dia tany be tendrombohitra sy lohasaha sady mifoka rano avy amin’ ny ranonoran-danitra,12 dia tany izay tandreman’ i Jehovah Andriamanitrao; ny mason’ i Jehovah Andriamanitrao mitsinjo azy mandrakariva hatramin’ ny fiandohan’ ny taona ka hatramin’ ny fiafarany.13 Ary raha hihaino tsara ny didiko izay andidiako anareo anio ianareo ka ho tia an’ i Jehovah Andriamanitrareo sy hanompo Azy amin’ ny fonareo rehetra sy ny fanahinareo rehetra,14 dia halatsako eo amin’ ny taninareo ny ranonorana amin’ ny fotoany, dia ny loha-orana sy ny fara-orana, mba hanangonanao ny varinao sy ny ranom-boalobokao ary ny diloilonao;15 ary hampaniriko ahitra ny sahanao ho an’ ny biby fiompinao, ary hihinan-kanina ianao ka ho voky.16 Kanefa mitandrema ianareo, fandrao ho voafitaka ny fonareo, ka hivily hanompo andriamani-kafa sy hiankohoka eo anatrehany ianareo;17 ary dia hirehitra aminareo ny fahatezeran’ i Jehovah, dia hanampina ny lanitra Izy, ka tsy hisy ranonorana, ary tsy hahavokatra ny tany; dia ho lany ringana faingana ianareo tsy ho eo amin’ ny tany soa izay omen’ i Jehovah anareo.
DEOTERONOMIA 11 :8-17
NY FAHOMBIAZAM-PIAINAN’NY MPINO
1-Miankina amin’ny fitahian’ Andriamanitra
Ampahafantarina ny Zanak’ Israely eto fa tsy mitovy amin’ny toetry ny tany Egypta ny toetry ny tany Kanana izay hidiran’izy ireo holovana. Ampy rano ny tany Egypta, noho izany dia mety tsara ny fambolena izay natao. Fa ny tany Kanana kosa na dia voalaza aza fa tany tondra-dronono sy tantely dia tany be tendrombohitra, tany mifoka rano. Sakana amin’ny fambolena izany. Mampanantena kosa Andriamanitra fa eo ambany fanaraha-masony izany tany izany. Rehefa mandray sy mankato ny didiny ny olona dia handatsaka orana ho antoky ny fahombiazan’ny asan’ny olona Izy.
2-Tsy hanadinoana an’ Andriamanitra
Fikasan’ Andriamanitra ny hananan’ny olona ny fiainam-pahombiazana, fiainana mirindra raha nanafaka azy ireo tany Egypta Izy. Mazava tsara anefa ny fanamabarany eto : Izy no mitahy ny fiainan’ny olona, miankina Aminy ny ho avin’ny olona. Ho foana io fitahiana io raha toa ka miala amin’ Andriamanitra indray ny olona ka manompo andriamanin-kafa. Raha manadino an’ Andriamanitra ny olona dia mandika ny didiny dia ho tapaka ny fifandraisany amin’ Andriamanitra. Mananatra antsika araka izany, raha mahita fahombiazana eo amin’ny fiainana isika, tandremo sao manadino an’Ilay loharanom-pitahiana indray.
Fanontaniana:
Nahoana ny olona manankarena sasany no tena mandroso amin’ny fanompoana an’ Andriamanitra ?
Ho an’Andriamanitra irery ihany ny voninahitra. Amen !