16 Fa hoy izaho: Mandehana araka ny Fanahy, dia tsy hahatanteraka ny filan’ ny nofo hianareo.17 Fa ny nofo manohitra ny Fanahy, ary ny Fanahy manohitra ny nofo; ary mifanohitra izy roroa, mba tsy hahazoanareo manao izay zavatra tianareo.18 Fa raha tarihin’ ny Fanahy ianareo, dia tsy mba ambanin’ ny lalàna.19 Fa miharihary ny asan’ ny nofo, dia izao: Fijangajangana, fahalotoana, fijejojejoana,20 fanompoan-tsampy, fanaovana ody ratsy, fandrafiana, fifandirana, adi-lahy, fiafonafonana, fifampiandaniana, fisarahana, fitokoana,21 fialonana, fahamamoana, filalaovan-dratsy, ary ny toy izany, izay lazaiko aminareo rahateo, tahaka ny voalazako fahiny koa, fa izay manao izany dia tsy handova ny fanjakan’ Andriamanitra.22 Fa ny vokatry ny Fanahy kosa dia fitiavana, fifaliana, fiadanana, fahari-po fahamoram-panahy, fanaovan-tsoa, fahamarinana,23 fahalemem-panahy, fahononam-po; tsy misy lalàna manohitra izany.24 Fa izay an’ i Kristy Jesoa dia efa nanombo ny nofony mbamin’ ny faniriany sy ny filàny tamin’ ny hazo fijaliana.25 Raha velon’ ny Fanahy isika, dia aoka handeha araka ny Fanahy.26 Aoka isika tsy handrani-tena foana ka hifampihaika sy hifampialona.
GALATIANA 5 :16-26
NY OLONA ARAKA NY FANAHY MASINA
Mampiavaka ny olona eto amin’izao tontolo izao ny itoeran’ny Fanahy Masina sy ny tsy itoerany. Impito miverina eto ny anarana : Fanahy Masina.
1-Ny olona araka ny Fanahy Masina
Antsoina hoe : « an’i Kristy » (and24) ny olona nandray ny Fanahy Masina. Tsy baikon’ny nofo na ny filàna intsony izy. Rehefa ny filàna ao amin’ny olona no mibaiko fa tsy ny Fanahy Masina dia olona araka ny nofo izy. Izao taratasy ho an’ny Galatiana izao dia maneho fa misy kristiana ivelany fa tsy itoeran’ny Fanahy Masina. Izany no ahitana ny faharatsiana marobe dimy ambin’ny folo (and 19-21). Havaozin’ny Fanahy Masina ny fiangonana ka esorina ao aminy ny toetra ratsin’izao tontolo izao ireo.
2-Ny vokatry ny Fanahy Masina
Misy fito izy ireo : fitiavana , fifaliana, fiadanana , fahari-po , fahamoram-panahy , fanaovantsoa , fahamarinana , fahalemem-panahy , fahononampo (and 22-23). Ireo toetra vokarin’ny Fanahy Masina ao amin’ny kristiana sy ny fiangonana ireo dia manova ny tontolo misy ny mpino. Ireo toetra ireo no hamantarana ny mino. Miavaka tsara ny mpino na ny kristiana ara-nofo sy ny kristiana araka ny Fanahy Masina. Fanahy mamelona ny Fanahy Masina ka manova ny fiainan’ny mino ho amin’ny fitiavana an’ Andriamanitra sy ny fifankatiavana. Ny fanovana ny fiaraha-monina ho tsara dia fanekena ny asan’ny Fanahy
Fanontaniana :
Inona no vokatry ny Fanahy Masina eo aminareo ?
Ho an’Andriamanitra irery ihany ny voninahitra. Amen !