17 Fa izaho mananatra anareo, ry rahalahy, mba hitandrina ny amin’ izay mahatonga ny fisarahana sy ny fahatafintohinana tsy araka ny fampianarana efa nianaranareo; mialà amin’ ireny olona ireny.18 Fa izy ireny tsy mba manompo an’ i Kristy Tompontsika, fa ny kibony ihany; ary teny malefaka sady tsara lahatra no amitahany ny fon’ ny tsy ary saina.19 Fa efa niely any amin’ ny olona rehetra ny lazan’ ny fanarahanareo. Ary faly aho noho ny aminareo; satria tiako ho hendry amin’ izay tsara ianareo, ary tsy hiharo amin’ izay ratsy.20 Fa Andriamanitry ny fiadanana hanorotoro an’ i Satana faingana eo ambanin’ ny tongotrareo. Ho aminareo anie ny fahasoavan’ i Jesoa Kristy Tompontsika.
ROMANA 16 :17-20
« TIAKO HO HENDRY AMIN’IZAY TSARA IANAREO » (and 19)
Raiso ho fiainanao izany teny izany anio. Aza atao afaka ambava, fa tsy tenin’i Paoly Apostoly ho an’ny Romana intsony izany fa efa nekentsika sy noraisintsika ho Tenin’ Andriamanitra ho antsika. Rehefa haintsika tsianjery izany dia ny hanao inona no hitaoman’ny Tompo antsika ?
1-Ny hanam-pahendrena amin’ny tsara .
Moa misy manam-pahendrena amin’ny ratsy ve ? Ny fahendrena eto dia ny fahaizana mamakafaka sy mandanjalanja tsara amin’izay hita sy re. Ny mifanohitra amin’ny olon-kendry araka ny teny eto dia ny « tsy àry saina » (and 18a). Koa ampiasao ny saina, ary mangataha tolotsaina avy amin’ny Tompo, fa omen ny Fanahin’ny fahazavan-tsaina isika. Mijoroa mba tsy ho rembin’ny fakampanahy. Aoka handanjalanja tsara vao hanapa-kevitra hanao an’itsy na iroa. Tsarao sy tarafo amin’ny fahamarinan’ny Tenin’Andriamanitra na izay ambara na ny atao. Tanteraho izany, satria tian’ny Tompo ho hendry amin’izay tsara isika.
2- Ny hitandrina amin’izay mahatonga ny fisarahana
« Tiako ho hendry amin’izay tsara ianareo ». Mariho tsara fa « ianareo », hoy ny Tompo. Tsy izaho na ianao, fa isika no itenenan’ny Tompo amin’ny hoe: « ianareo ». Andeha hifampitaona hanao ny tsara sy haneho ny fahendrena amin’izay eny ivelany, ka isika no hiara-hientana fa tsy olom-bitsy . Manamafy izany ny and 17 « Izaho mananatra anareo …hitandrina tsara ny amin’izay mahatonga ny fisarahana ».
Fanontaniana:
Inona no olana tsy hahafahantsika mifandresy lahatra haneho fahendrena ao amin’ny fiaraha-monina?
Ho an’Andriamanitra irery ihany ny voninahitra. Amen !