19 Ary nisy Jiosy tonga avy tany Antiokia sy Ikonioma, izay nitaona ny vahoaka ka nitora-bato an’ i Paoly, dia nitarika azy ho eny ivelan’ ny tanàna, satria nataony fa efa maty izy.20 Fa nony nanodidina azy ny mpianatra, dia nitsangana izy ka lasa niakatra tao an-tanàna. Ary nony ampitso dia niala tao izy sy Barnabasy ka nankany Derbe.21 Ary rehefa nitory ny filazantsara tamin’ izany tanàna izany izy ka nahazo mpianatra maro, dia niverina nankany Lystra sy Ikonioma ary Antiokia indray izy,22 nampahery ny fanahin’ ny mpianatra ka nananatra azy haharitra amin’ ny finoana, sady nilaza fa tsy maintsy ho amin’ ny fahoriana be no idirantsika amin’ ny fanjakan’ Andriamanitra.23 Ary rehefa nanendry loholona teo amin’ ny isam-piangonana izy, dia nivavaka sady nifady hanina ka dia nanolotra azy ho an’ ny Tompo Izay efa ninoany.24 Ary rehefa nandeha namaky an’ i Pisidia izy, dia tonga tany Pamfylia.25 Ary nony efa nitory ny teny tany Perga izy, dia nidina nankany Atalia.26 Dia niondrana an-tsambo niala teo izy hankany Antiokia, izay efa nanolorana azy ho amin’ ny fahasoavan’ Andriamanitra ho amin’ ny asa izay novitainy.27 Ary rehefa tonga tao izy ka namory ny fiangonana, dia nilaza izay rehetra nataon’ Andriamanitra tamin’ ny nombany azy, sy ny namohany varavaram-pinoana ho an’ ny jentilisa.28 Dia nitoetra elaela ihany tamin’ ny mpianatra izy.
ASAN’NY APOSTOLY 14 :19-28
Ny vavolombelon’ny Tompo dia
1-Mitondra fampaherezana
Anisan’ny iraka omen’ny Tompo antsika vavolombelony ny fampaherezana ny hafa. Tao amin’i Paoly io fisainana io, satria rehefa afa-doza izy (toa-bato) dia tsy navelany ireo mpianatra tany Antiokia sy Ikionioma fa niverenany nampaherezina , nohamafisiny ny finoan’izy ireo mba hahazoany ny fanjakan’ Andriamanitra . Niova ho fijoroana ho vavolombelon’ ny fijaliana izay nandalovan’i Paoly. Tsy nandositra olana izy fa nanamafy aza ny fahoriana dia làlana mitondra antsika amin’ny fahombiazana.
2-Mampiroborobo ny asa fitoriana
Ireo hetsika rehetra hita ato amin’ity perikopa ity dia manambara fa tena tsy tafandry mandry mihitsy i Paoly sy Barnabasy. Mandeha etsy, mandeha eroa noho ny fitoriana ny Filazantsaran’ny fanjakan’ Andriamanitra izay maha- vavolombelona azy ireo (and 22). Tao ny fandaminana mba hoentina handrindrana izay fitoriana sy fampiroboroboana ny asan’ Andriamanitra, fanendrena ireo loholona isam-piangonana. Tao ny fiombonam-bavaka sy fifadian-kanina, ary izay tena lehibe dia ny tsy fahalalana vizana satria tsy nitandro hasasarana tamin’ny fivezivezena ireto vavolombelon’ny Tompo ireto.
Fanontaniana
Manaova jery todika amin’ny fandaharam-potoananao dia jereo izay hahafahana mampitombo ny fotoana ho an’ny asan’ny Tompo .
Ho an’Andriamanitra irery ihany ny voninahitra. Amen !