16 Indro, Izaho maniraka anareo ho tahaka ny ondry ao ampovoan’ ny amboadia; koa hendre tahaka ny menarana, ary morà tahaka ny voromailala.17 Ary mitandrema ianareo noho ny amin’ ny olona; fa hatolony ho amin’ ny Synedriona sy hokapohiny ao amin’ ny synagogany hianareo;18 ary ho entiny eo anatrehan’ ny mpanapaka sy ny mpanjaka ianareo noho ny amiko, ho vavolombelona aminy sy amin’ ny jentilisa.19 Fa raha manolotra anareo izy, dia aza manahy ny amin’ izay fomba hitenenanareo, na izay holazainareo; Fa homena anareo amin’ izany ora izany izay holazainareo.20 Fa tsy ianareo no miteny, fa ny Fanahin’ ny Rainareo no miteny ao anatinareo.
MATIO 10 :16-20
NY VAVOLOMBELON’I JESOA KRISTY
1-Misy mpanenjika
Mampiomana sy mampitandrina ny mpianatra ny Tompo fa tsy mora ny fanatanterahana ny asany. Ny tontolo anirahana an’ireto mpianatra hitoriana ny Filazantsara dia ahitana hatrany ireo fahavalo . Koa mila mitandrina tsara isika .Tokony hatao ho zava-dehibe hatrany ny famitana ilay iraka amin’ny fampiharana eo amin’ny fiainana ny fampianarana efa nomen’ny Tompo. Tarihana araka izany isika fa tsy asa mora ny fijoroana ho vavolombelon’ i Jesoa Kristy sy ny fitoriana ny Filazantsara. Raha tojo zava-manahirana isika fiangonana dia aza kivy na mihemotra fa efa nampiomana antsika Izy.
2-Homban’ Andriamanitra
Miezaka hatrany ny fahavalo hanakana ny asa fitoriana ny Filazantsara. Tsy mijanona amin’ny fanenjehana ihany mantsy ny fitondrana ny Anaran’i Jesoa Kristy fa tonga hatramin’ny fisamborana sy ny fitsarana aza. Mampanantena anefa ny Tompo fa rehefa miseho tokoa izany dia tsy tokony hanahy ny mpianatra. Tsy mamela ny olona hiady irery ny Tompo. Ny Fanahy Masina izay efa nomen’ny mpino Azy no solovava mampiteny izay lazaina fa mifanaraka amin’ny sitrapon’ Andriamanitra. Fanehoana izany fa momba mandrakariva ny Fiangonana amin’ny alalan’ny Fanahy Masina ny Tompo .Matokia fa tsy avelany ho resy tosiky ny fahavalo ny fiangonany.
Fanontaniana :
Nahoana no misy olona menatra ny ho vavolombelon’ny Tompo eo amin’ny fiainana ?
Ho an’Andriamanitra irery ihany ny voninahitra. Amen !