13 Ary tamin’ izay Jesoa dia avy tany Galilia ka tonga teo amoron’ i Jordana, dia nanatona an’ i Jaona Izy mba hataony batisa.14 Fa Jaona nandà Azy ka nanao hoe: Izaho no tokony hataonao batisa, ka Ianao indray va no mankaty amiko?15 Fa namaly Jesoa ka niteny taminy hoe: Ekeo ihany ankehitriny, fa izao no mety amintsika hahatanteraka ny fahamarinana rehetra. Ka dia nekeny Izy.16 Ary raha vao natao batisa Jesoa, dia niakatra avy teo amin’ ny rano niaraka tamin’ izay Izy; ary, indro, nisokatra taminy ny lanitra, ary hitany ny Fanahin’ Andriamanitra nidina tahaka ny voromailala ka nankeo amboniny.17 Ary, injao! nisy feo avy tany an-danitra nanao hoe: Ity no Zanako malalako Izay sitrako.
MATIO 3 :13-17
NY BATISAN’I JESOA KRISTY
1-Fanehoany ny fanetretenany
Indro i Jaona manao Batisa ireo sokajin’olona manatona azy. Tamin’izany indrindra no tonga teo Aminy i Jesoa mba hataony Batisa tahaka ny olona rehetra. Nanda mafy i Jaona satria ny batisa ataony dia Batisan’ny fibebahana. Fantany tsara fa i Jesoa izay manoloana azy dia Zanak’ Andriamanitra tsy manana ota. Notaomin’i Jesoa izy mba hanao ny batisa satria izany no firosoana amin’ny fahamarinan’ Andriamanitra. Manafoana ny tenany ny Tompo sady io koa no fotoana hanehoany sahady fa tonga Izy haka ny toeran’ny olombelona mpanota ho famonjena .
2-Fanehoana ny fiombonana amin’ny Rainy
Nasehon’ Andriamanitra eto ny maha- iraka manokana an’i Jesoa Kristy ka tokony hohenoina sy ankatoavin’ny olona. Tsy hoe teo amin’io fotoana io vao nomen’ Andriamanitra ny Fanahy masina i Jesoa. Efa niasa tao Aminy ny Fanahy Masina saingy nasehon’ Andriamanitra io fotoana miavaka io ho fanehoana amin’ny olona manatrika teo fa io no zanany hanao asa manokana ho famonjena ny olona . Tsy miasa irery Izy fa miombona tanteraka ao Aminy ny Rainy izay naniraka Azy sy ny Fanahy masina. Anjaran’ny olona noho izany ny mandray sy mankato Azy sy ny asany.
Fanontaniana:
Azo lazaina ve ny asan’ny Fanahy Masina eo amin’ny fiainan’ny mpino ?
Ho an’Andriamanitra irery ihany ny voninahitra. Amen !