16 Ary ny mpianatra iraika ambin’ ny folo lahy dia nankany Galilia, ho any amin’ ilay tendrombohitra nasain’ i Jesoa halehany.17 Ary nony nahita Azy izy, dia niankohoka, fa ny sasany niahanahana.18 Ary Jesoa nanatona dia niteny taminy ka nanao hoe: Efa nomena Ahy ny fahefana rehetra any an-danitra sy etỳ an-tany;19 koa mandehana ianareo, dia ataovy mpianatra ny firenena rehetra, manao batisa azy ho amin’ ny anaran’ ny Ray sy ny Zanaka ary ny Fanahy Masina20 sady mampianatra azy hitandrina izay rehetra nandidiako anareo; ary, indro, Izaho momba anareo mandrakariva ambara-pahatongan’ ny fahataperan’ izao tontolo izao.
MATIO 28 :16-20
I JESOA TOMPON’NY FAHEFANA REHETRA
« Efa nomena Ahy ny fahefana rehetra any an-danitra sy ety an-tany, hoy i Jesoa , raha nitsangana tamin’ny maty «
1-I Jesoa manambara ny fahefany
Manambara ny tenany i Jesoa fa Azy ny fahefana rehetra any an-danitra sy ety an-tany. Tsy i Jesoa niafina tamin’ny fanetrentena no voasoratra eto. Efa hiakatra any an-danitra ny Tompo. Izy Andriamanitra dia ampy hilaza ny tenany. Teo amin’ny fanombohana ny asany dia nambaran’ny lanitra fa Zanak’ Andriamanitra Izy. Eto kosa dia manambara ampahibemaso amin’ny maha-Andriamanitra Azy i Jesoa teo amin’ny mpianany. Tompon’ny fahefana rehetra i Jesoa Kristy. Ampahafantarina izany koa ny olona rehetra .
2-I Jesoa antoky ny asa misiona rehetra
Fahefana mamonjy izao tontolo izao ny fahefana omen’ny Tompo . Fototra hahatanteraka izany ny fanirahany ny mpianany. Maniraka hanao mpianatra sy hanao batisa, amin’ny anaran’ny Ray sy ny Zanaka ary ny Fanahy masina ary hampianatra fankatoavana an’ Andriamanitra i Jesoa. Amin’ny maha- Andriamanitra Azy dia fahefany ny mizara andraikitra sy miantoka ny fahatanterahan’izany amin’ny mpianany. Tsy ny olona rehetra no hizarany andraikitra fa ny mpianany sy izay mankato Azy amin’ny famonjena izao tontolo izao. Manana asa goavana hotanterahina ny Fiangonan’i Jesoa Kristy ilay maniraka sy manome fahefana ny fiangonany.
Fanontaniana:
Manao ahoana ny finoanao ny fahefan’i Jesoa Kristy hanatanterahanao ny iraka
Ho an’Andriamanitra irery ihany ny voninahitra. Amen !