41 Ary nahoana ianao no mijery ny sombin-kazo izay eo amin’ ny mason’ ny rahalahinao, nefa ny andry izay eo amin’ ny masonao dia tsy mba tsaroanao akory? 42 Ary ahoana no ilazanao amin’ ny rahalahinao hoe: Ry rahalahy, aoka hesoriko ny sombin-kazo eo amin’ ny masonao, nefa tsy mba hitanao ny andry eo amin’ ny masonao? Ry mpihatsaravelatsihy, esory aloha ny andry eo amin’ ny masonao, ary amin’ izany dia ho hitanao tsara ny hanesoranao ny sombin-kazo eo amin’ ny mason’ ny rahalahinao.43 Fa tsy misy hazo tsara mamoa voa ratsy na hazo ratsy mamoa voa tsara.44 Fa samy fantatra amin’ ny voany avy ny hazo rehetra; fa tsy misy manoty aviavy amin’ ny tsilo, na voaloboka amin’ ny voaroy.45 Ny olona tsara fanahy dia mamoaka ny tsara avy amin’ ny rakitra tsaran’ ny fony; ary ny ratsy fanahy kosa dia mamoaka ny ratsy; fa amin’ ny haben’ ny ao am-pony no itenenan’ ny vavany.46 Ary nahoana ianareo no miantso Ahy hoe: Tompoko, Tompoko, nefa tsy manao izay lazaiko?47 Izay rehetra manatona Ahy sy mandre ny teniko ka mankatò azy, dia hasehoko aminareo izay tahaka azy:48 Tahaka ny olona nanao trano izy, izay nihady lalina ary nanisy fanorenana teo ambonin’ ny vatolampy; ary nony tondraka ny rano, dia namely mafy izany trano izany ny riaka, nefa tsy nahahozongozona azy, satria tsara fanorenana izy.49 Fa izay mandre, fa tsy mankatò, dia tahaka ny olona izay nanao trano teo ambonin’ ny tany, fa tsy nanisy fanorenana; dia namely azy mafy ny riaka, ka dia nirodana niaraka tamin’ izay izy; ary loza ny naharavan’ izany trano izany.
LIOKA 6 :41-49
DINIHO NY LÀLANAO
1-Mahaiza mandini-tena
Aza maika hitsara ny namanao ianao. Fantaro aloha ny tenanao sy ny ataonao. Tena mifanaraka amin’ny sitrapon’ Andriamanitra ve sa ny sitrapon’ny tenanao no mibaiko anao. Tarafo eo amin’ny atao sy ny fiainan’ny olona ny tena maha-kristiana azy araka ny voalaza hoe : « samy fantatra amin’ny voany ny hazo rehetra ». Noho izany, mahaiza ianao mandini-tena . Mananatra antsika i Jesoa Kristy hamantatra ny tenantsika aloha. Mamoa voa mendrika ny maha- kristiana anao tokoa va ianao ? Omeo toerana eo amin’ny fiainanao ny Tenin’ Andriamanitra ?
2-Misehoa ho mpanompo mahatoky
Ny mpanompo mahatoky dia mahay manaja sy mankato ny tompony izay manome baiko sy toromarika azy. Ary toy izany koa ny mpianatra manaraka ny toromarika omen’ny mpampianatra. Matoky fa ny mpampianatra dia mitarika ho amin’ny làlam-pahendrena mahasoa hatrany. Takin’i Jesoa Kristy araka izany hiseho tokoa ho tena mpanompo mahatoky na mpianatra mahatoky ireo manaiky hanara-dia Azy. Tena hanaja sy hankato, hanaraka ny teniny satria ny teniny dia teny marina mitondra fiainana mandrakariva ho an’izay mandray izany. Na dia misy aza ny fitsapana tsy maintsy hilalaovana, ny olona miaina marina amin’ny tenin’i Jeosa Kristy dia mahita vahaolana hatrany, mandray fandresena.
Fanontaniana:
Azonao lazaina ve ny anajra toeran’ny Tenin’ Andriamanitra eo amin’ny fiainanao ?
Ho an’Andriamanitra irery ihany ny voninahitra. Amen !