37 Ary rehefa nanakaiky Izy ka tonga teo am-pidinana amin’ ny tendrombohitra Oliva, dia nifaly avokoa ny mpianatra maro be ka nidera an’ Andriamanitra tamin’ ny feo mahery noho ny asa lehibe rehetra izay efa hitany38 ka nanao hoe: Isaorana anie ny Mpanjaka, Izay avy amin’ ny anaran’ i Jehovah. Fiadanana any an-danitra, ary voninahitra any amin’ ny avo indrindra.39 Fa ny Fariseo sasany, izay teo amin’ ny vahoaka, nanao taminy hoe: Mpampianatra ô, rarao ny mpianatrao.40 Fa Izy namaly ka nanao hoe: Lazaiko aminareo fa raha mangina ireo, dia ny vato no hiantsoantso.41 Ary raha nanakaiky Izy ka nahita ny tanàna, dia nitomany azy42 ka nanao hoe: Raha mba nahafantatra mantsy ianao na dia amin’ ity andro ity aza izay momba ny fiadanana! – fa ankehitriny miafina amin’ ny masonao izany.43 Fa ho avy aminao ny andro izay hananganan’ ny fahavalonao tovon-tany manodidina anao, dia hanemitra anao izy ka hanidy anao manodidina44 ary hamongotra anao hatramin’ ny tany mbamin’ ny zanakao ao anatinao, ka tsy havelany hisy vato mifanongoa eo aminao, ho valin’ ny tsy nahafantaranao ny andro namangiana anao.
LIOKA 19 :37-44
JESOA NO TOMPO
1-Midera an’i Jesoa mpanjaka ny vahoakany
Efa ela no niandrasan’ny Jiosy ny Mesia mpanjaka mba hanafaka azy amin’ny fanjanahantany Romana. Faly ny mpianatra mpanaraka an’i Jesoa, ka nidera Azy tamin’ny feo mahery. Tsy zakan’ny Fariseo izany satria manelingelina ny tombotsoany amin’i Kaisara sy i Heroda .Tsy hain’ny mpanenjika an’i Jesoa nampanginina ny fiderana : « Isaorana anie ny mpanjaka , izay avy amin’ny Anaran’i Jehovah » . Mpanjaka avy any an-danitra i Jesoa, sady itoeran’ny voninahitra. Ilay olombelona hitan’ny olona sy niaraka taminy, dia ninoany sy nekeny ho avy amin’ny avo indrindra. Andro famangian’ Andriamanitra mahery ny tany izao fidiran’i Jesoa ho ao Jerosalema izao.
2-Midera an’i Jesoa mpaminany ny vahoakany
Miteraka hery ao amin’ny madinik’i Jesoa ny finoana sy ny fahitany ny Tompony. Fahefana sy hery tsy amboamboarina ny fahefany. Mitomany anefa i Jesoa. Fantany ny fandravana sy ny loza hanjo an’i Jerosalema, noho ny tsy finoana sy ny tsy fanekena ny Tompo(and 41). Tandremo sao miandry porofo vao hino izay ambaran’i Jesoa. Manambara ny tenin’ny Ray sy ny tsy maintsy hahatanterahany ary ny zavatra hitranga i Jesoa. Ao anatin’ny karemy isika izao, mandiniha tena sao dia mampangina ny fiderana tokony hatao ho an’Ilay mpanjaka sady mpaminany. Ekeo sy raiso Ilay mesia mpanjaka mpaminany, mpisorona ho Tompon’ny fiainantsika.
Fanontaniana:
Inona avy ny endriky ny tsy finoana an’i Jesoa Kristy ?
Ho an’Andriamanitra irery ihany ny voninahitra. Amen !