11 Ry malala, mananatra anareo aho, satria vahiny sy mpivahiny ianareo, fadio ny filan’ ny nofo, fa miady amin’ ny fanahy ireny;12 ary aoka ho tsara ny fitondran-tenanareo eo amin’ ny jentilisa, mba hankalazany an’ Andriamanitra amin’ ny andro famangiana noho ny ahitany ny asa tsara ataonareo, dia izay anendrikendrehany anareo ho mpanao ratsy.13 Ary noho ny Tompo dia maneke izay rehetra voatendrin’ ny olona, na ny mpanjaka, satria ambony izy,14 na ny mpanapaka, satria nirahiny hamaly izay manao ratsy izy, fa ho mpidera izay manao tsara.15 Fa toy izany no sitrapon’ Andriamanitra, hampanginanareo ny tsi-fahalalan’ ny olona adala amin’ ny fanaovan-tsoa;16 fa olona afaka ianareo, nefa aza mitondra ny fahafahanareo ho fanaronana ny ratsy, fa ho toy ny mpanompon’ Andriamanitra.17 Manajà ny olona rehetra. Tiava ny rahalahy. Matahora an’ Andriamanitra. Manajà ny mpanjaka.
1 PETERA 2 :11-17
NY TOE-PANAHY MENDRIKA NY MAHA- KRISTIANA
Mananatra sy mampirisika ny mpino hivelona amin’ny fiainana kristiana marina i Petera .
1-Kristiana maneho ny fahatsaran’ Andriamanitra
Miaina ao anatin’ny fiaraha-monina isehoan-javatra samihafa ny fiangonana. Toe-javatra izay maro no mety hifanohitra amin’ny fiainana maha-kristiana. Mety holazain’ny mpitazana fa miaina toy ny fanaon’izy ireo ny kristiana. Mazava tsara noho izany ny fananarana atao amin’ny mpino : mijoroa, misehoa ho tena kristiana. Ataovy ho fitsipi-piainana hitondrana ny fiainana ny sitrapon’ Andriamanitra. Raha mitondra ny fiainana araka ny Tenin’ Andriamanitra ny mpino dia ho gaga izao tontolo izao fa hafa tokoa izany fiainana kristiana izany. Fiainana maneho ny fahatsaran’ Andriamanitra.
2-Kristiana miaina amin’ny fitiavana
Tarihana hankato ny fahefana mitondra ny fiaraha-monina ny kristiana. Tsy noho ilay mpitondra manokana fa noho i Jesoa Kristy Ilay Tompo izay tompoiny .Toa aseho fa ny fahefana rehetra izay misy dia avy amin’ Andriamanitra na navelan’ Andriamanitra hiseho. Fiainana miavaka ny fiainana kristiana satria manaraka ny didin’i Jesoa Kristy ka mahay manaja na dia izay heverina ho fahavalo aza. Ary indrindra, ilay fitiavan’ Andriamanitra manapaka ao anatiny dia mitarika ny mpino hahay hitia hatrany sy hahay mampian-trano vahiny ary izay mila-tolo-tànana.
Fanontaniana:
Mety misy kristiana ve sarotra hiaraha-monina?
Ho an’ Andriamanitra irery ihany ny voninahitra. Amen !