MOFON’AINA SABOTSY 13 AOGOSITRA 2022

15 ka nanao hoe: Mihainoa ianareo, ry Joda rehetra sy ry mponina any Jerosalema, ary ianao, ry Josafata mpanjaka: Izao no lazain’i Jehovah aminareo: Aza matahotra na mivadi-po ny amin’ireo olona betsaka ireo, fa tsy anareo ny ady, fa an’Andriamanitra. 16 Rahampitso dia midìna hiady aminy ianareo; fa, indreo, hiakatra amin’ny fiakarana Ziza izy; ary ianareo hahita azy eo amin’ny faran’ny lohasahan-driaka tandrifin’ny efitr’i Jeroela. 17 Tsy ianareo anefa no hiady amin’ity; mijanòna tsara, fa ho hitanareo ny hamonjen’i Jehovah anareo, ry Joda sy Jerosalema. Aza matahotra na mivadi-po, fa rahampitso dia mivoaha hiady aminy; fa Jehovah no momba anareo. 18 Dia niankohoka tamin’ny tany Josafata; ary ny Joda sy ny mponina rehetra tany Jerosalema niankohoka teo anatrehan’i Jehovah koa ka nivavaka. 19 Dia nitsangana ny Levita, taranaky ny Kehatita sy taranaky ny Koraita, mba hidera an’i Jehovah, Andriamanitry ny Isiraely, tamin’ny feo mahery indrindra.20 Ary nifoha maraina koa izy, dia niainga nankany an-efitr’i Tekoa; ary nony nivoaka izy, dia nitsangana teo Josafata ka nanao hoe: Mihainoa ahy, ry Joda, sy ianareo, ry mponina eto Jerosalema: Minoa an’i Jehovah Andriamanitrareo, dia ho tafatoetra ianareo; minoa ny mpaminaniny, dia hambinina ianareo. 21 Ary rehefa niara-nihevitra tamin’ny olona izy, dia nanendry mpihira ho an’i Jehovah hidera amin’ny fihaingoana masina, raha mivoaka eo anoloan’ny olona efa voaomana hiady, ka hanao hoe: Miderà an’i Jehovah, fa mandrakizay ny famindram-pony. 22 Ary raha vao nanomboka nihoby sy nidera ireo, dia nasian’i Jehovah otrika hamely ny taranak’i Amona sy Moaba sy ny avy any an-tendrombohitra Seira, izay avy hamely ny Joda, ka dia resy ireo. 23 Dia nitsangana ny taranak’i Amona sy Moaba namely ny avy any an-tendrombohitra Seira ka namono sy nandringana azy; ary nony voaringany ny mponina tany Seira, dia nifandringana kosa izy samy izy ihany.II TANTARA 20:15-23

1- Omban’i Jehovah izay matoky Azy

Nisy firenena maromaro nitsangana hiady tamin’ny firenen’i Joda tamin’ny andron’i Josafata Mpanjaka. Natahotra azy ireo tokoa i Josafata satria maro be izy ireo. Nivavaka mafy tamin’Andriamanitra ny olona rehetra noho izany nangataka fanampiana, araka izay voalaza hoe « niangona ny Joda hangataka famonjena amin’i Jehovah, eny, avy tamin’ny tanànan’i Joda rehetra hitady an’i Jehovah izy ». Notarihin’i Josafata mihitsy izany fangataham-panampiana tamin’i Jehovah izany dia ny hanomezany vahaolana ho azy ireo amin’izay ady mananontanona satria heveriny fa handripaka azy ireo izany. Hita eto anefa fa omban’i Jehovah izay mivavaka sy mangataka marina Aminy satria voalaza hoe «tsy anareo ny ady fa an’Andriamanitra ». Manoloana ny zava-tsarotra mitranga izany dia mitodiha amin’Andriamanitra, mivavaha, mangataha Aminy fa tsy mijery fotsiny ny fahorian’ny olony Izy (cf Eks 14 :13-14)

2- Aza hamaivanina ny fiderana Azy

Rehefa voavaly ny fangatahan’i Josafata sy ny olona amin’ny Joda rehetra ny amin’ny hiatrehana ny fahavalo dia izao ny voalaza avy eo : nitsangana ny Levita taranaky ny Kehatita sy ny taranaky ny Koraita mba hidera an’i Jehovah Andriamanitry ny Israely. » Araka izany, amin’ny atao rehetra dia tsy azo atao ambanin-javatra ny fiderana sy fisaorana Azy ary mampianatra antsika ity tenin’Andriamanitra ity, araka ilay voalazan’i Jesoa hoe mandehana dia manaova tahaka izany koa. Mandrakariva mantsy rehefa azo ny zavatra notadiavin’ny olona Taminy dia hadinoin’ny olona mihitsy Andriamanitra.

Ho an’Andriamanitra irery ihany ny voninahitra.