13 Nefa ny mpaminany rehetra sy ny mpahita rehetra dia nasain’ i Jehovah nananatra ny Isiraely sy ny Joda hoe: Mialà amin’ ny làlanareo ratsy, ary tandremo ny lalàko sy ny didiko, araka ny lalàna rehetra izay nandidiako ny razanareo sy izay nanirahako ny mpaminany mpanompoko ho aminareo.14 Kanefa tsy nihaino izy, fa nanamafy ny hatony, tahaka ny razany, izay tsy nino an’ i Jehovah Andriamaniny.15 Ary nolaviny ny didiny sy ny fanekeny izay nataony tamin’ ny razany mbamin’ ny teni-vavolombelony izay nananarany azy; ary nandeha nanaraka ny zava-poana izy, ka dia tonga zava-poana koa ary nanaraka ny jentilisa manodidina azy, izay efa nandraran’ i Jehovah azy mba tsy halainy tahaka.16 Ary nahafoy ny didin’ i Jehovah Andriamaniny rehetra izy ka nanao sarin-javatra an-idina ho an’ ny tenany, dia ombilahy kely roa, ary nanao Aseraha koa izy sady niankohoka teo anatrehan’ izay rehetra eny amin’ ny lanitra ary nanompo an’ i Bala.17 Ary nampandeha ny zananilahy sy ny zananivavy hamaky ny afo izy, sady nanao fankatovana sy sikidy ary nivaro-tena hanao izay ratsy eo imason’ i Jehovah ka nampahatezitra Azy.18 Koa dia tezitra indrindra tamin’ ny Isiraely Jehovah, dia nesoriny tsy ho eo imasony izy, ka tsy nisy sisa afa-tsy ny firenen’ i Joda ihany.19 Ary ny Joda koa aza tsy mba nitandrina ny didin’ i Jehovah Andriamaniny, fa nandeha araka izay rehetra nataon’ ny Isiraely koa.20 Dia narian’ i Jehovah ny taranak’ Isiraely rehetra ka nampahoriny sy natolony ho eo an-tànan’ ny mpamabo azy mandra-panaisony azy tsy ho eo imasony.21 Fa nendahany niala tamin’ ny taranak’ i Davida ny Isiraely; ary ny olona nampanjaka an’ i Jeroboama, zanak’ i Nebata; ary Jeroboama dia nampiala ny Isiraely tsy hanaraka an’ i Jehovah ka nampanota azy indrindra.22 Ary ny Zanak’ Isiraely nandeha tamin’ ny fahotana rehetra nataon’ i Jeroboama, fa tsy niala tamin’ izany izy23 mandra-panaisotr’ i Jehovah ny Isiraely tsy ho eo anatrehany, araka izay nampilazainy ny mpaminany mpanompony rehetra. Ka dia lasan-ko babo niala tamin’ ny taniny ho any Asyria ny Isiraely ka mbola any mandraka androany.
2 MPANJAKA 17 :13-23
NY OLONA TSY MANDRAY FANANARANA
1-Tsy mety mihaino
Hitan’ Andriamanitra fa mivily làlana ny olona . Naniraka mpaminany Izy mba hananatra, hitaona ny olona hiverina Aminy. Mitaona ny olona hankato ny didiny sy ny fitsipiny . Miharihary eto fa tsy mety nihaino ny irak’ Andriamanitra ny Zanak’Israely fa nifikitra tamin’ny faharatsiany hatrany, niroso hatrany tamin’ny fanompoana andriamanin-kafa. Miharihary fa ny olona tsy mandray fananarana dia olona mafy fo tsy mety mihaino ny antsom-pitiavana ataon’ Andriamanitra aminy. Vokany: tsy mety mibebaka miala amin’ny faharatsiana. Ianao kosa ,aza manamafy ny fonao fa mandraisa fananarana .
2-Iharan’ny famaizana
Rehefa tsy mety mihaino ny irak’ Andriamanitra ny Zanak’Israely , nandeha tamin’ny ditry ny fony nanaraka andriamanin-kafa , niodina Taminy , nandeha tamin’ny endri-paharatsiana rehetra dia ho avy ny famaizana azy ireo . Hananatra sy hanitsy azy ireo Andriamanitra hahatsapany fa làlan-diso no nizorany, tafasaraka tamin’ Andriamanitra, loharanom-pitahiana izy. Ho avy ny fampahoriana ataon’ny fahavalony, eny, ho rava aza ny fireneny ka ho babo any an-tanin’olona izy ireo . Tsarovy àry, fa rehefa tafasaraka amin’ Andriamanitra ny fiainantsika dia mandalo fotoan-tsarotra isika. Fananarana ataony izany , antso hiverenantsika Aminy .
Fanontaniana:
Nahoana no misy olona tsy mety mandray ny antso ataon’ Andriamanitra ?
Ho an’Andriamanitra irery ihany ny voninahitra.Amen !