1 Moa midera tena indray va izahay, sa toy ny sasany ka mila epistily filazan-tsoa anay ho aminareo, na avy aminareo?2 Ianareo no epistilinay voasoratra ato am-ponay sady fantatra sy vakin’ ny olona rehetra;3 eny, aseho ho epistilin’ i Kristy izay entinay ianareo, tsy nosoratana tamin’ ny ranomainty anefa, fa tamin’ ny Fanahin’ Andriamanitra velona, tsy teo amin’ izay tena vato fisaka, fa teo amin’ izay vato fisaka nofo, dia ny fo.4 Ary manana izany fahatokiana izany ny amin’ Andriamanitra izahay amin’ ny alalan’ i Kristy.5 Kanefa tsy mihambo hanana fahaleovana avy aminay hihevitra na amin’ inona na amin’ inona izahay; fa ny fahaleovanay dia avy amin’ Andriamanitra,6 Izay efa nampahaleo anay koa ho mpanompo amin’ izay fanekena vaovao, nefa tsy amin’ ny soratra, fa amin’ ny Fanahy; fa ny soratra mahafaty, fa ny Fanahy no mahavelona.
2 KORINTIANA 3 :1-6
NY VOKATRY NY ASAN’NY FANAHY MASINA
Ao anatin’ny fanoheran’ny mpampianatra sandoka ao amin’ny fiangonana tao Korinto ny Apostoly Paoly. Ireo dia manambara fa fireharehana ny Epistily nosoratany.
1-Ny Fiangonana dia Epistily avy amin’ny Fanahy Masina
Vavolombelon’ny Fanahy Masina ny fiangonana tao Korinto. Ao am-pon’ny Apostoly ny fitiavany ny fiangonana tao Korinto. Voasoratra tamin’ny fanahin’ Andriamanitra velona (and 3). Ny vokatry ny asan’ny Fanahy Masina dia tsy hay vonoina na fafana, tsy tahaka ny voasoratra amin’ny ranomainty. Porofo velona ho an’ny Apostoly ny fiangonana fa tsy fideran-tena no nambarany teo aloha fa tena manambara ny marina sy ny tena fanompoany tokoa. Vavolombelon’ny fanompoan’ny Apostoly Paoly ny fijoroan’ny fiangonana.
2-Ny Apostoly mpanompon’ny Fanahy Masina
Fanompoana avy amin’ny Fanahy Masina ny fanompoan’ny Apostoly . Minisitry ny Filazantsaran’i Jesoa Kristy no dikateny ilazana izany fanompoana izany .Koa izany fahaleovana na fahafahany manao na fahombiazana amin’izao fanompoana izao dia tsy avy aminy fa avy amin’ Andriamanitra (and 5). Andriamanitra no nampiditra azy ho amin’ny fanompoana ao amin’ny fanekena vaovao, araka ny Fanahy Masina fa tsy didy aman-dalàna akory. Tsy sora-tànna no nanendrena ny Apostoly ho mpanompo fa tamin’ny Fanahy Masina.
Ho an’Andriamanitra irery ihany ny voninahitra. Amen !