11 Ary ny anjely rehetra nitsangana manodidina ny seza fiandrianana mbamin’ ny loholona sy ny zava-manan-aina efatra, dia niankohoka teo anoloan’ ny seza fiandrianana izy ka nivavaka tamin’ Andriamanitra12 nanao hoe: Amena! Ny saotra sy ny voninahitra sy ny fahendrena sy ny fisaorana sy ny haja sy ny hery ary ny faherezana anie Ho an’ Andriamanitsika mandrakizay mandrakizay. Amena.13 Ary ny anankiray tamin’ ny loholona namaly ka nanao tamiko hoe: Iza moa ireo miakanjo akanjo fotsy lava? Ary avy taiza izy? 14 Fa hoy izaho taminy: Tompoko, ianao no mahalala. Dia hoy izy tamiko: Ireo no avy tamin’ ny fahoriana lehibe, ary ny akanjony nosasany sy nofotsiany tamin’ ny ran’ ny Zanak’ ondry.15 Ary noho izany dia mitoetra eo anoloan’ ny seza fiandrianan’ Andriamanitra izy ka manompo Azy andro aman’ alina eo amin’ ny tempoliny; ary Ilay mipetraka eo ambonin’ ny seza fiandrianana dia hamelatra ny trano-lainy handrakotra azy.16 Tsy ho noana na hangetaheta intsony ireo; ary tsy haninona azy ny masoandro na izay hafanana akory.17 Fa ny Zanak’ ondry Izay eo afovoan’ ny seza fiandrianana no ho Mpiandry azy ka hitondra azy ho amin’ ny loharanon’ ny ranon’ aina; ary hofafan’ Andriamanitra ny ranomaso rehetra amin’ ny masony. »
APOKALYPSY 7 :11-17
Vanim-potoana tsy maintsy hanatanterahan’ny Tompo izay efa nolazainy no miseho sahady eto dia ny fahitana ireo mpanompo mahatoky miray feo manome Voninahitra an’ Andriamanitra . Mampiharihary izao fa misy tokoa ny fikasan’ Andriamanitra tsy takatry ny saina.
1-Mamonjy ny olona amin’ny Ran’ny Zanakondry
« ary ny akanjony nosasany sy nofotsiany tamin’ny Ran’ny Zanakondry » (and 14a). Ny fotsy no lokon’ny fandresena , izany hoe : voatafy famonjena ny olona rehefa nanatona mba hodiovin’ny Ran’i Jesoa Kristy ary tsy manota intsony . Ny finoana ny famonjena nataon’i Jesoa Kristy tamin’ny nanolorany ny tenany ho toy ny Zanakondry natao sorona no hahaizantsika manome Voninahitra Azy dieny izao.
2-Mamelona fanantenana momba ny ho avy
« ary ilay mipetraka eo ambonon’ny seza fiandrianana dia hamelatra ny tranolainy handrakotra azy » (and 15b). Feno fanomezan-toky ny Tenin’ Andriamanitra raha manambara ilay fonenana mandrakizay hovantanin’ny mino rehefa miala ety. Tsy misy fahoriana intsony ary miara-mitoetra Aminy isika izay naharitra tamin’ny finoana sy ny fitandremana ny didiny . Miseho tokoa ny fahendren’ Andriamanitra tsy takatry ny saina nefa hinoantsika dia mahazo mialoha ny anjara tsara amin’izao teny izao isika .
Fanontaniana :
Efa no tafianao ve ny fitafiam-pamonjena ?
Ho an’Andriamanitra irery ihany ny voninahitra. Amen !