9 Ary nony niala teo Jesoa, dia nahita lehilahy atao hoe Matio nipetraka teo am-pamorian-ketra, ka hoy Izy taminy; Andeha hanaraka Ahy. Dia nitsangana Matio ka nanaraka Azy.10 Ary raha nipetraka nihinana tao an-trano Izy, indreo, nisy mpanota sy mpamory hetra maro tonga ka niara-nipetraka tamin’ i Jesoa mbamin’ ny mpianany.11 Ary ny Fariseo, raha nahita izany, dia niteny tamin’ ny mpianatra hoe: Nahoana kosa ny Mpampianatra anareo no miara-komana amin’ ny mpamory hetra sy ny mpanota?12 Ary raha nahare izany Jesoa, dia nanao hoe: Tsy ny finaritra no mila mpanao fanafody, fa ny marary.13 Fa mandehana ka mianara izay hevitry ny teny hoe: famindrampo no sitrako, fa tsy fanatitra alatsa-drà; fa tsy tonga hiantso ny marina Aho, fa ny mpanota.
MATIO 9 :9-13
Tantara maneho ny niantsoan’i Jesoa Kristy an’i Matio no hitantsika eto .Matio nosokajian’ny olona ho tena mpanota satria mpamory hetra. Tsy nahasakana an’i Jesoa hiasa ho famonjena, ho fanafahana azy izany.
1-Tia ny olona rehetra
Voasokajy ho isan’ny mpanota i Matio noho ny asany. Noheverin’ny olona indrindra ireo Fariseo fa tsy tokony hisy irak’ Andriamanitra hifanerasera aminy. Noheverina ho tsy misy famonjena ho azy intsony. Rehefa nahita azy anefa ny Tompo, dia niantso azy mba hanaraka Azy .Fanesorana azy amin’ny tontolo namatotra azy izany. Nanaiky ny antson’ny Tompo i Matio, afaka tamin’ny fatoran’ny faharatsiana izy. Mampianatra antsika izany fa tian’ Andriamanitra hovonjena ny olona rehetra ka tsy manavaka izay tiany antsoina handray ny famonjena Izy .
2-Manana ny fomba fiasany
Miavaka ny fomba fiasan’i Jesoa Kristy. I Matio no nantsoina kanefa indreo olona marobe sokajiana ho mpanota no tonga miara-mipetraka Aminy tao an-tranon’i Matio. Rehefa namaly ny antson’i Jesoa tokoa mantsy i Matio dia niantso ireo namany ho ao an-tranony , mila mihaona amin’i Jesoa mba handray ny famonjena ihany koa ireto olona ireto . Mampianatra antsika ny amin’ny fomba entina mitory ny Filazantsara izany nefa mananatra antsika mba tsy hanilika ny hafa tahaka ny nataon’i Fariseo. Jereo hatrany ireo sokajin’olona mila vonjy.
Fanontaniana:
Inona no anatra azonao horaisina amin’izao fomba fiasa nataon’i Jesoa Kristy izao ?
Ho an’Andriamanitra irery ihany ny voninahitra. Amen !