6 Ary ny Zanak’ Isiraely dia nanao izay ratsy eo imason’ i Jehovah indray ka nanompo ireo Bala sy Astarta sy ny andriamanitr’ i Syria sy ny andriamanitr’ i Sidona sy ny andriamanitr’ i Moaba sy ny andriamanitry ny taranak’ i Amona ary ny andriamanitry ny Filistina, dia nahafoy an’ i Jehovah izy ka tsy nanompo Azy.7 Dia nirehitra tamin’ ny Isiraely ny fahatezeran’ i Jehovah, ka nivarotra azy ho eo an-tànan’ ny Filistina sy ho eo an-tànan’ ny taranak’ i Amona Izy.8 Ary nampahory sy nanorotoro ny Zanak’ Isiraely ireo tamin’ izany taona izany: valo ambin’ ny folo taona no nampahoriany ny Zanak’ Isiraely rehetra, izay tany an-dafin’ i Jordana, tany amin’ ny tanin’ ny Amorita any Gileada.9 Ary nita an’ i Jordana ny taranak’ i Amona mba hiady koa amin’ ny Joda sy ny Benjamina ary ny taranak’ i Efraima; ka dia nahantra indrindra ny Isiraely.10 Dia nitaraina tamin’ i Jehovah ny Zanak’ Isiraely ka nanao hoe: Efa nanota taminao izahay, satria efa nahafoy an’ Andriamanitray ka nanompo ireo Bala.11 Ary hoy Jehovah tamin’ ny Zanak’ Isiraely: Moa tsy efa namonjy anareo tamin’ ny tanan’ ny Egyptiana sy ny Amorita sy ny taranak’ i Amona ary ny Filistina va Aho?12 Ary nampahory anareo koa ny Sidoniana sy ny Amalekita ary ny Maonita, ka nitaraina tamiko hianareo, dia novonjeko tamin’ ny tànany.13 Nefa hianareo nahafoy Ahy ka nanompo andriamani-kafa; koa izany kosa no tsy hamonjeko anareo intsony.14 Mandehana, ka mitaraina amin’ ireo andriamanitra efa nofidinareo; aoka ireo no hamonjy anareo amin’ ny andron’ ny fahantranareo.15 Ary hoy ny Zanak’ Isiraely tamin’ i Jehovah: Efa nanota izahay; ataovy aminay izay rehetra sitrakao; kanefa mba vonjeo ihany izahay anio.16 Dia nanary ireo andriamani-kafa tao aminy izy ka nanompo an’ i Jehovah; dia tsy nahatsindry ny fanahiny intsony Jehovah noho ny fahantran’ ny Isiraely.
MPITSARA 10 :6-16NY FANOMPOANA ANDRIAMANITRA HAFA DIA:
1-Mahatezitra an’ Andriamanitra
Fitantarana sy fanehoan-javatra tena miavaka ao amin’ny Baiboly ny fanehoana ny fifandraisan’ny olona amin’ Andriamanitra, satria haseho ao fa tena mpivadibadika tokoa ny olona , izany hoe: ny fanekeny an’ Andriamanitra ho Mpamonjy sy hivavahana nefa vetivety eo dia miala amin’ Andriamanitra indray izy ireo fa mitodika amin’ny zavatra hafa mihitsy . Haseho eto fa mahatezitra mafy an’ Andriamanitra izany fihetsiky ny olona izany ka mahatonga Azy hampitondra faisana ny olona . Eto izany dia aseho amin’ny hoe: nahantra indrindra ny zanak’ Israely, izany hoe: niaina tao anaty fijaliana tamin’ny lafiny rehetra noho ny fialana tamin’ Andriamanitra , satria nahatezitra mafy Azy ny zavatra nataony .
2-Miantso ny olona hiverina Aminy Izy
Ao amin’ny and 14 dia manao eson-teny ny olona Andriamanitra noho ny hadalan’ny olona ihany , kanefa mampieritreritra koa Izy ka hiantso azy handanjalanja ny zavatra misy eo amin’ny fiainany . Taomina ny olona hampitaha hoe: nanao ahoana izy fony teo ambany fitondran’ Andriamanitra sy ny zava-nanjo azy ireo rehefa niala tamin’ Andriamanitra indray. Tsapa eto fa nahatsiaro ny fahadisoany ny olona ka nanao hoe: « efa nanota izahay , ataovy aminay izay rehetra sitrakao, kanefa mba vonjeo izahay » (and 15). Lazaina fa mahatsara ny olona ny zava-tsarotra mihatra amin’ny fiainany mba handinihany tena.
Fanontaniana:
Manaiky ve ianao fa mahatsara ny olona , ny kristiana indrindra ny zava-tsarotra sedrainy?
Ho an’Andriamanitra irery ihany ny voninahitra. Amen !