1 Mampahatsiarova azy hanaiky izay manapaka sy manam-pahefana, hanoa tsara, ho vonona ho amin’ ny asa tsara rehetra,2 tsy hiteny ratsy olona, tsy ho mpila ady, fa ho mpandefitra, maneho ny halemem-panahy rehetra amin’ ny olona rehetra.3 Fa isika koa dia adala fahiny, tsy nanaiky, voafitaka, dia andevon’ ny filàna sy ny fahafinaretana maro, ary velona teo amin’ ny lolompo sy ny fialonana, sady hala no nifankahala.4 Fa rehefa niseho ny fahamoram-panahin’ Andriamanitra, Mpamonjy antsika, sy ny fitiavany ny olona,5 dia tsy avy tamin’ ny asa amin’ ny fahamarinana izay nataontsika, fa araka ny famindrampo kosa no namonjeny antsika, tamin’ ny fanasan’ ny fiterahana indray sy ny fanavaozan’ ny Fanahy Masina,6 Izay naidiny betsaka tamintsika tamin’ ny alalan’ i Jesosy Kristy, Mpamonjy antsika,7 mba hohamarinina amin’ ny fahasoavany isika ka ho tonga mpandova araka ny fanantenana ny fiainana mandrakizay.
TITOSY 3 :1-7MANAOVA NY TSARA
1-Manaiky ny mpanapaka sy manam-pahefana ny olon’Andriamanitra
Taomina ny fiangonana hankato ny manam-pahefana. Omanina ny kristiana ho vonona amin’ny asa tsara amin’ny fiainany andavanandro . Manao ny asa rehetra ho voninahitr’ Andriamanitra. Ampianarina ihany koa ny kristiana hiaina amin’ny fiaraha- monina : tsy hiteny ratsy olona sy tsy ho mpila ady, ho mpandefitra sy ho malemy fanahy amin’ny olona rehetra. Tarihana ho mpanala ny olona amin’ny fahadalana sy andevozin’ny filàna ary ny fahafinaretana maro ny kristiana. Mitondra fiadanana sy fihavanana eo amin’ny fiaraha-monina .Manoro sy mampianatra ny mpitarika ny fiangonana ny Apostoly Paoly, hanam-paharetana sy hiandry ny ondrin’ Andriamanitra, ka hianatra izany ao amin’i Kristy.
2-Mamonjy ny olona amin’ny famindrampony ny Tompo
Rehefa tonga amin’ny finoana an’i Jesoa Kristy ny olombelona vokatry ny fiterahana indray sy ny fanavaozan’ny Fanahy Masina dia ho foana ny ady sy ny fifandirana ary ny herisetra (and 4). Vokatry ny asan’ny Fanahy Masina izay miasa ao anatintsika ny asa tsara ataontsika kristiana. Natobaka ho an’ny mino an’i Jesoa Kristy ny Fanahy Masina araka ny famindrampony, mba hohamarinina ny olombelona mpanota ka handova ny fiainana mandrakizay. Manome fanantenana ny mpino ny Tompo, mba hikatsaka ny fiainana mandrakizay fa tsy ny filàna sy ny fahafinaretan’izao tontolo izao. Omena andraikitra izany ny mpiandry ondrin’ Andriamanitra rehetra hitarika ny kristiana hiaina sy hivelona ao amin’ny fahasoavana sy ny famindrampon’ny Tompo. Izany no làlana omen’ny Tompo sy ny Apostoly ho an’i Titosy tao Kreta (Tit 1 :5).
Ho an’Andriamanitra irery ihany ny voninahitra. Amen !