17 Ary rehefa maty Joiada, dia avy Ireo mpanapaka ny Joda ka niankohoka teo anatrehan’ ny mpanjaka. Dia nihaino azy ny mpanjaka.18 Ary nandao ny tranon’ i Jehovah, Andriamanitry ny razany, ireo ka nanompo ny Aseraha sy ny sampy dia nisy fahatezerana nihatra tamin’ ny Joda sy Jerosalema noho ny fahadisoany.19 Ary naniraka mpaminany tany aminy Izy hampiverina azy amin’ i Jehovah; dia nananatra azy mafy ireo, nefa tsy nety nihaino izy.20 Ary Zakaria, zanak’ i Joiada mpisorona, notsindrian’ ny Fanahin’ Andriamanitra, dia nitsangana teo amin’ ny avoavo teo anatrehan’ ny vahoaka izy ka nanao taminy hoe: Izao no lazain’ Andriamanitra: Nahoana ianareo no mandika ny didin’ i Jehovah ka tsy mahita fanambinana? Satria efa nahafoy an’ i Jehovah ianareo, dia nahafoy anareo kosa Izy.
2 TANTARA 24 :17-20
AZA MIFANDRAY AMIN’NY MPANAO RATSY
1-Mahaiza mandinika ny zava-misy
I Joiada dia mpisorona nitarika an’i Joasy mpanjakan’i Joda ho amin’ny fankatoavana an’ Andriamanitra. Rehefa maty anefa i Joiada dia nanolo-tsaina sy nampivily làlana an’i Joasy mpanjaka ireo mpanapaka tao amin’ny fanjakany. Niala tamin’ny fanarahana ny sitrapon’ Andriamanitra izy. Nandao ny fanompoana an’ Andriamanitra ny mpanjaka. Niroso lalina tamin’ny fanompoana ny sampy . Noho izany dia tezitra ka hanafay ny olony Andriamanitra . Mitarika antsika izany fa mahaiza mandinika ny zava-misy. Tandremo ny tolo-tsaina avy amin’ilay ratsy mitaona anao handao ny fanompoana an’ Andriamanitra.
2-Mahaiza mihaino fananarana
Naniraka ny mpanompony hananatra sy hamerina an’i Joasy ho amin’ny fanompoana Azy indray Andriamanitra. Fitiavana Izy ka tsy tiany handeha ho amin’ny làlam-pahaverezana ny olony. Nanao antso avo teo anatrehan’ny vahoaka ny irak’ Andriamanitra . Ny zava-misy anefa tsy nety nihaino izany ny mpanjaka fa nitady ny fomba hamonoana ilay irak’ Andriamanitra. Tafalatsaka lalina tao anatin’ny faharatsiana izy ka tsy nety nandray fananarana. Nahafoy an’ Andriamanitra izy ireo. Noho izany tsy misy fiainam-pitahiana ho azy. Raiso ho fananarana sy ho fanitsiana ny toetranao ny Tenin’ Andriamanitra tafapaka eo aminao.
Fanontaniana:
Fomba ahoana no ahafahanao manavaka fa mahasoa na tsy mahasoa ny tolokevitra omen’ny olona anao ?
Ho an’Andriamanitra irery ihany ny voninahitra.Amen !