1 Fa ny Fanahy milaza marina fa amin’ ny andro aoriana dia hihemotra amin’ ny finoana ny sasany, manaiky fanahy mamitaka sy fampianaran’ ny demonia,2 amin’ ny fihatsaram-belatsihin’ ny mpilaza lainga, ka voapetaky ny vy mahamay ny fieritreretany,3 izay mandrara tsy hanam-bady, ary mampifady hanina, izay nataon’ Andriamanitra ho an’ izay mino sady mahalala ny marina, mba horaisiny amin’ ny fisaorana.4 Fa ny zavatra rehetra nataon’ Andriamanitra dia tsara avokoa, ka tsy misy tokony holavina, raha raisina amin’ ny fisaorana,5 satria hamasinin’ ny tenin’ Andriamanitra sy ny fivavahana izany.
1 TIMOTY 4 :1-5
NY FANAMBARAN’NY FANAHY MASINA
1-Fihemoran’ny mino amin’ny finoana any aoriana (and 1-3)
Manambara ny toetran’ny mino ankehitriny sy ho avy ny Fanahy Masina. Hisy ireo hihemotra sy hiala amin’ny finoana, hivavaka amin’ny fanahy mpandainga na fanahy mamitaka. Hisy ihany koa ny mpino manaiky ny fampianaran’ny demonia. Fihemorana avy amin’ny mpandainga sy mpamitaka mampianatra eo amin’ny fiangonana. Fampianaran-diso manandratra ny fahalalana ho làlam-pamonjena. Fampahorian-tena no ampianariny, mandrara tsy hanambady, mampifady sakafo araka ny fomba Jiosy nefa manarampo amin’ny hanina (1 Kor 10.20-21). Ireo mpampianatra ireo dia « voapetaky ny vy mahamay ny fieritreretany » (and2) ka mandà ny Tompo. Mihambo ho tompon’ny fahamasinana sy fahalalana (and 1 ; 1 Tim 6 :20) ka manambany ny mpino.
2-Ny fahatsaran’ny faharian’ Andriamanitra (and 4)
« fa ny zavatra rehetra nataon’ Andriamanitra dia tsara avokoa »(and 4, Gen 1 :31) araka ny Soratra Masina . Avy amin’ny Tenin’ Andriamanitra ny fahamasinana (Jao 17 :7) fa tsy amin’ny moraly na ny filozofia sy ny firehan-kevitra. Ho an’ny olona no nanaovan’ Andriamanitra ny fanambadiana sy ny sakafo, araka ny Soratra Masina. Isaorana ny Tompo sy ankalazana ary ankasitrahana Azy izany. Raisintsika avy amin’ny Tompo isanandro ny sakafontsika, hoy ny vavaka nampianarin’ny Tompo.
Fanontaniana:
Manao ahoana ny anjara toeran’ny Soratra Masina ho an’ny olona namasinina fanambadiana ?
Ho an’Andriamanitra irery ihany ny voninahitra. Amen !