9 Fa mitandrema ianareo, fa hatolotra amin’ ny Synedriona sy hokapohina ao amin’ ny synagoga ary hitsangana eo anatrehan’ ny mpanapaka sy ny mpanjaka noho ny Amiko ianareo ho vavolombelona aminy.10 Ary ny firenena rehetra tsy maintsy hitoriana ny Filazantsara aloha.11 Koa raha mitondra anareo hatolotra izy, dia aza manahy rahateo izay holazainareo; fa izay teny homena anareo amin’ izany ora izany no holazainareo; fa tsy ianareo no hiteny, fa ny Fanahy Masina.
MARKA 13 :9-11
MPIANATRY NY TOMPO
Marka 13 dia maneho ny dinidinika nataon’i Jesoa Kristy tamin’ny mpianatra teo amin’ny tendrombohitra oliva niaraka tamin’ny mpianatra Izy. Azo lazaina fa valiteny manoloana ny fanontaniana nataon’ireo mpianatra efatra mirahalahy. Manomana azy ireo ny amin’ny toe-javatra tsy maintsy hitranga noho izany ny Tompo .
1-Vavolombelon’i Jesoa Kristy
Miasa, manao ny asan’ny Tompo eto anivon’izao tontolo izao ny Tompo. Efa nanolotra ny fiainana ho azy izy ireo ka nandao ny fiainan’izao tontolo izao . Mijoro ho vavolombelon’ny Tompo amin’ny fiainany manontolo ka mitory ny Filazantsara amin’ny olona rehetra. Mitaona anao araka izany mba hijoro ho vavolombelon’i Jesoa Kristy. Andraikitra manokana apetraky ny Tompo ny asa fitoriana ny Filazantsara.
2-Manana ny Fanahy Masina ho mpanolotsaina
Rehafa tena manao ny asan’ny Tompo isika dia tsy faly ilay ratsy. Misy ireo sokajin’olona tsy mankasitraka ny asa fitoriana ny Filazantsara. Te -hamatotra ny fiainan’ny olona hatrany i satana. Noho izany , tonga ny fanenjehana sy ny fankahalana ny mpianatry ny Tompo. Aza kivy anefa fa mijoroa hatrany satria mampanantena eto ny Tompo fa ny Fanahy Masina izay efa nomeny ny mino Azy no mampiteny , mampijoro manoloana ny fotoana sarotra rehetra . Ny Fanahy Masina no hery mampiteny ny mpino.
Fanontaniana:
Manana fahasahiana hijoro ho vavolombelon’i Jesoa Kristy eo anoloan’ny manampahefana ve ianao ? Fomba ahoana?
Ho an’Andriamanitra irery ihany ny voninahitra. Amen !