8 Tsarovy Jesoa Kristy Izay natsangana tamin’ ny maty, dia Ilay avy tamin’ ny taranak’ i Davida, araka ny filazantsarako,9 izay iaretako fahoriana hatramin’ ny fatorana aza, hoatra ny mpanao ratsy; nefa ny tenin’ Andriamanitra dia tsy mba voafatotra.10 Izany no iaretako ny zavatra rehetra noho ny amin’ ny olom-boafidy, mba hahazoan’ ireny koa famonjena, dia izay ao amin’ i Kristy Jesosy, mbamin’ ny voninahitra mandrakizay.11 Mahatoky izao teny izao: Fa raha miara-maty aminy isika, dia hiara-belona aminy koa;12 raha miaritra isika, dia hiara-manjaka aminy; raha mandà Azy isika, Izy kosa handà antsika;13 fa na dia tsy matoky Azy aza isika, dia mbola mahatoky ihany Izy, fa tsy mahazo mandà ny tenany.
2 TIMOTY 2 :8-13I Jesoa Kristy nitsangana tamin’ny maty no vontoatin’ny Filazantsara. Io no fahamarinana fototra ho an’ny finoana kristiana satria raha tsy natsangana i Kristy dia foana ny finoana sy ny toriteny .
Ny Filazantsaran’ny fitsanganana amin’ny maty
1-no hahazakana fahoriana
Mamerina antsika amin’ilay andro tokana niaretan’i Jesoa Kristy ny kapoka, ny latsa, eso, hazo fijaliana ary fahafatesana. Tao Aminy no nianaran’i Paoly ka tonga mpiombona fahoriana amin’i Kristy izy. Tsy nitsangana tamin’ny maty mihitsy i Kristy raha tsy niaritra ny fahafatesana aloha. Ny Filazantsara no mampianatra antsika hanahaka an’i Kristy. Izy no efa nitondra fahoriana mihoatra antsika.
2-no miantoka ny famonjena
Andriamanitra mahatoky i Jesoa Kristy ka tsy mahazo mandà ny tenany momba ny famonjena . Famonjena no antony nahafatesany ary porofon’izany ny nitsanganany tamin’ny maty. Tsy nohazonin’ny fahafatesana Izy satria Andriamanitra mandresy. Mizara izany fandresena izany ho an’ny mino mahatoky ihany koa Izy. Izay nizaka ny fahoriana toa Azy, dia ampanantenainy famonjena ka hiara-belona Aminy koa.
Fanontaniana:
Mety ve raha manao vy very ny aina (kamikaze) ho an’ny Tompo ny mino ?
Ho an’Andriamanitra irery ihany ny voninahitra. Amen !